गएको वर्ष चीनको जनसङ्ख्या घटेको छ । त्यहाँको जन्मदर पनि घटेर कीर्तिमानी न्यून स्तरमा ओर्लिएको छ ।

योसँगै लगातार दोस्रो वर्ष पनि जनसङ्ख्यामा कमी आएको हो । यो प्रवृत्तिले जनसङ्ख्याको बनावटमा परिवर्तनले विश्वको दोस्रो ठुलो अर्थतन्त्र चीनमा गहिरिँदै गएको चुनौती झल्काएको छ ।

प्रत्येक १ हजार जनाले ६ दशमलव ३९ जना शिशु जन्माएका छन् । एक वर्ष अघि यो दर ६ दशमलव ७७ थियो । चीनको राष्ट्रिय तथ्याङ्क कार्यालय (एनबीएस)ले बुधवार घोषणा गरेअनुसार यो जन्मदर सन् १९४९ मा कम्युनिस्ट चीनको स्थापना भयायताकै सबैभन्दा कम हो ।

गएको वर्ष चीनमा जम्मा ९० लाख २० हजार शिशु जन्मिएको तथ्याङ्कले देखाएको छ । सन् २०२२ मा चीनभरमा ९५ लाख ६० हजार जति शिशु जन्मिएका थिए ।

समीक्षा अवधिमा चीनको समग्र जनसङ्ख्या अघिल्लो वर्षको तुलनामा २० लाख ८० हजारले घटेर १ अर्ब ४० करोड ९० लाखमा झरेको एनबीएसले बताएको छ ।