कैलालीको धनगढी उपमहानगरपालिकाले स्वास्थ्य सेवामा नागरिकको पहुँच बढाउँदै लगेको छ । पछिल्लो समय उपमहानगरले ‘विशेषज्ञ वडा स्वास्थ्य क्लिनिक’ कार्यक्रम सञ्चालन गरेर नागरिकको स्वास्थ्य सेवामा पहुँच बढाएको हो ।

उपमहानगरले आर्थिक अभावले उपचार गर्न नसक्ने गरिब तथा विपन्न नागरिकलाई घरदैलोमा पुगेर निःशुल्क विशेषज्ञ स्वास्थ्य सेवा दिने उद्देश्यले गत आर्थिक वर्ष २०७९–०८० को साउनदेखि सुरु गरेको उक्त कार्यक्रम प्रत्येक महिना १९ वटै वडामा सञ्चालन गर्दै आएको उपमहानगरका स्वास्थ्य शाखा प्रमुख योगेश अवस्थीले जानकारी दिए ।

वडा स्वास्थ्य क्लिनिकमा एकजना जनरल फिजिसियन र एकजना स्त्री तथा प्रसूति रोग विशेषज्ञ चिकित्सकबाट स्वास्थ्य सेवा दिँदै आइएको उनले बताए । चालु आवको साउनदेखि पुस मसान्तसम्म छ महिनामा यक्त कार्यक्रममार्फत १७ हजार ५३१ जनाले निःशुल्क उपचार सेवा लिएका प्रमुख अवस्थीले जानकारी दिए ।

उनका अनुसार सो अवधिमा १३ हजार ९६३ महिला र तीन हजार ५६८ पुरुषले सेवा लिएका छन् । शाखा प्रमुख अवस्थीका अनुसार छ हजार ५६० महिला, दुई हजार ७७८ पुरुष गरी नौ हजार ३३८ जनाले जनरल फिजिसियनबाट र तीन हजार ५०६ जना महिलाले स्त्री तथा प्रसूति रोग विशेषज्ञबाट सेवा लिएका छन् ।

त्यस्तै, तीन हजार ८९७ महिला र ७९० पुरुष गरी चार हजार ६८७ जनाले आँखा सम्बन्धी सेवा लिएको धनगढी उपमहानगरपालिकाले जनाएको छ । सो अवधिमा सेवा लिनेमध्ये दुई हजार ३९४ जना ७० वर्षभन्दा माथिका रहेका छन् । क्लिनिकमा प्रयोगशाला, अल्ट्रासाउण्ड, इसिजी, फिजिसियन, स्त्री तथा प्रसूति रोग, निजी अस्पतालसँगको समन्वयमा आँखा, दाँत, हाडजोर्नी, मानसिक लगायतका रोग सम्बन्धी सेवा दिइरहेको उपमहानगरले जनाएको छ ।

सो अवधिमा दुई हजार ७९८ ले निःशुल्क प्रयोगशाला जाँच, दुई हजार ३२४ जना गर्भवतीले सेवा लिएकामा एक हजार ४७८ ले निःशुल्क अल्ट्रासाउण्ड सेवा लिएका शाखा प्रमुख अवस्थीले बताए । क्लिनिक कार्यक्रमबाट ग्रामीण क्षेत्रका विपन्न नागरिकले सहजरुपमा विशेषज्ञ स्वास्थ्य सेवा पाइरहेको उनको भनाइ थियो । उपमहानगर प्रमुख गोपाल हमालले आर्थिक अवस्था कमजोर भएर स्वास्थ्य उपचारबाट वञ्चित भएका नागरिकलाई लक्षित गरी ‘विशेषज्ञ वडा स्वास्थ्य क्लिनिक’ कार्यक्रम सञ्चालन गरिएको बताए ।

‘ग्रामिण क्षेत्रमा कतिपयको कुखुरा बेचेर उपचार गर्नुपर्ने अवस्था छ । यो सेवा त्यस्ता नागरिकका लागि लक्षित गरी सञ्चालन गरेका हौँ,’ उनले भने । यो सेवालाई अझै विस्तार गर्दै लगिने उनको भनाइ थियो । गत आवमा वडा स्वास्थ्य क्लिनिकबाट ३५ हजार ६१९ महिला र १० हजार ७० पुरुष गरी ४५ हजार ६८९ जनाले सेवा लिएका उपमहानगर प्रमुख हमालले जानकारी दिए ।