काठमाडौंको टुँडिखेल पुगेकाहरूबीच ठेलमठेल हुँदा भिडमा च्यापिएर आठ जना ‌घाइते भएका छन् ।

माघे संक्रान्तिका अवसरमा थारू र मगर समुदायले सोमबार टुँडिखेलमा माघी विशेष कार्यक्रम आयोजना गरेका छन् । माघी विशेष कार्यक्रममा सहभागी हुन गएकाहरूबीच मुख्य प्रवेश द्वारमा ठेलमठेल हुँदा भिडभाडमा च्यापिएर आठ जना घाइते भएको जिल्ला प्रहरी परिसर काठमाडौंका प्रवक्ता एसपी कुमुद ढुंगेलले जानकारी दिए ।

घाइतेहरू सबैलाई उपचारका लागि राष्ट्रिय ट्रमा सेन्टमा भर्ना गरिएको छ । एसपी ढुंगेलका अनुसार घाइतेहरूको स्वास्थ्य अवस्था सामान्य छ ।