पोखरामा सामाजिक सञ्जाल फेसबुकमा नक्कली आइडी बनाएर हनी ट्र्याप गर्ने तीन जनालाई प्रहरीले नियन्त्रणमा लिएको छ । केटीको नामको नक्कली आइडी बनाएर पुरुषहरूलाई हनी ट्र्यापमा पारेपछि उनीहरूलाई प्रहरीले नियन्त्रणमा लिएको हो ।

फेसबुकमा साथी बनाएर फोन गर्ने, अश्लिल भेडिओहरू देखाउने र स्क्रिन रेकर्ड गर्ने तीन जनालाई प्रहरीले नियन्त्रणमा लिएको छ । भिडिओ र स्क्रिण रेकर्ड सामाजिक सञ्जालमा पोष्ट गरिदिने भन्दै डर धम्की दिखाएर उनीहरूले पैसा असुली गर्दै आएको जिल्ला प्रहरी कार्यालय कास्कीले जनाएको छ ।

पक्राउ पर्नेमा पोखरा २९ तालचोकमा बस्ने २२ वर्षीय अनुराग घिमिरे, चितवन रत्ननगर १३ का २० वर्षीय प्रवेश रिमाल र लहान नगरपालिका १ का २१ वर्षीय युनिक सिंह छन् । उनीहरूलाई चितवन प्रहरीको सहयोगमा नियन्त्रणमा लिइएको कास्की प्रहरी प्रवक्ता डीएसपी श्रवणकुमार विकले जानकारी दिए ।