सूचनाको शक्ति - The Power Of Information

        

नेपाली साह्रै कम खान्छन् कुखुराको अण्डा र मासु !

नेपालमा अण्डा र कुखुराको मासुको खपत कम हुने गरेको छ । विकसित देशको तुलनामा नेपालमा कुखुराको अण्डा र मासु खपत कम हुने गरेको नेपाल कुखुरा व्यवसायी मञ्चले जनाएको छ । मञ्चका अनुसार विकसित मुलुकमा वार्षिक ४३३ सम्म अण्डा खपत हुँदा नेपालमा ६१ मात्रै खपत हुने गरेको छ ।

चीनमा ४३३, जापानमा ३९७, अमेरिकामा ३२२ अण्डा वार्षिक प्रतिव्यक्ति खपत हुने गरेको छ भने क्यानडामा ३०२, बङ्गलादेशमा ८०, भारतमा ७९ र पाकिस्तामा ७२ प्रतिव्यक्ति अण्डा खपत हुने गरेको मञ्चले जनाएको छ । मञ्चका अध्यक्ष रघुनाथ भट्टका अनुसार कुखुराको मासुको खपतमा समेत नेपाल निकै तल रहेको छ ।

विकसित मुलुकमा वार्षिक प्रतिव्यक्ति मासु ७४ दशमलव सात किलोसम्म खपत हुँदा नेपालमा सात दशमलव ५७ किलो मात्र खपत हुने गरेको छ । सेन्टभिन्सेन्ट ग्रेनडाइन्समा ७४ दशमलव सात किलो खपत हुने गरेको छ भने इजरायलमा ६८ दशमलव नौ किलो, सामोआमा ६५ दशमलव सात किलो खपत हुने गरेको छ ।

यस्तै ट्रिनिडाड टोवागोमा ६३ दशमलव एक किलो, एन्टिगुवा वारबुडामा ६१ दशमलव आठ किलो र अमेरिकामा ५८ दशमलव सात किलो, सेन्ट लुसियामा ५७ दशमलव छ किलो र हङ्कङमा ५५ दशमलव पाँच किलो प्रतिव्यक्ति प्रतिवर्ष कुखुराको मासु खपत हुने गरेको मञ्चका अध्यक्ष भट्टले जानकारी दिए ।

कुखुराको अण्डा र मासुमा मानव शरीरलाई आवश्यक पर्ने पौष्टिक तत्त्व पर्याप्त मात्रामा पाइने भए पनि नेपालमा खपत कम हुने गरेको छ । नेपालमा दैनिक अण्डा अत्पादनको क्षमता ६० लाखवटा भए पनि हाल ३० देखि ३२ लाख मात्र उत्पादन हुँदै आएको पनि मञ्चका अध्यक्ष रघुनाथ भट्टले जानकारी दिएको छ ।

मासु उत्पादनको क्षमता दैनिक १० लाख किलो भए पनि हाल छ लाख किलो मात्रै उत्पादन हुँदै आएको अध्यक्ष भट्टले जानकारी दिए । उनका अनुसार देशको कुल गार्हस्थ्य उत्पादनको तीन दशमलव पाँच प्रतिशत हिस्सा ओगटेको यस क्षेत्रमा एक खर्ब ६० अर्ब रूपैयाँ लगानी भएको अनुमान गरिएको छ ।

यसमा चार लाख ५० हजार व्यक्तिले प्रत्यक्ष रोजगारी पाइरहेको नेपाल कुखुरा व्यवसायी मञ्चले जनाएको छ । यस पेसाले आयात प्रतिस्थापन गर्दै आम देशवासीलाई सबैभन्दा सस्तो मूल्यमा गुणस्तरीय र पोषणयुक्त मासु तथा अण्डा उपलब्ध गराउँदै आएको मञ्चका निवर्तमान अध्यक्ष राजेन्द्र लामिछानेले बताए । कुखुराको मासु र अण्डा मानव स्वास्थ्यका लागि उपयुक्त खाद्यान्न मानिन्छ ।

चिकित्सकले पनि रातो मासुभन्दा सेतो मासु र अण्डा खान सुझाव दिँदै आएका छन् । कुखुराको मासु र अण्डामा कुनै मिसावट नहुने, चिल्लोको मात्रा कम, प्रोटिनको मात्रा बढी हुने, पकाउन सजिलो, पचाउन सहज हुने, युरिक एसिड, मुटु रोगीका बिरामीलाई समेत उपयोगी हुने, कुनै पनि प्रकारको मिसावट हुन नसक्ने, सहज रूपमा आवश्यकता अनुसार पाउन सकिने चिकित्सक बताउँछन् ।

यस्तै सस्तो मूल्यमा पाउन सकिने, जुनसुकै उमेर समूहका मानिसको समेत रूचिको खानेकुरा नै कुखुराको मासु र अण्डा भएको लामिछाने बताउँछन् । मञ्चले ११ औँ राष्ट्रिय पोल्ट्री दिवस, २०८० अवसरमा जारी गरेको सूचनामा कुखुराको मासु र अण्डाले कुपोषण हुनबाट बचाउन महत्त्वपूर्ण योगदान पुर्याउँदै आएको छ । विसं २०१७ पुस १७ गते बाराको परवानीपुर सेन्ट्रल ह्याचरीको उद्घाटनपछि नेपालमा आधुनिक पोल्ट्रीको सुरूआत मानिँदै आएको छ ।

दिवसलाई मञ्चले सप्ताहव्यापीरुपमा मनाउँदै आएको छ । यस वर्ष ‘कुखुराको अण्डा र मासुको परिकार, स्वस्थ जीवनको आधार’ भन्ने मूल नाराका साथ विशेष गरी स्कुलमा अध्ययनरत विद्यार्थीलाई अण्डा र कुखुराको मासुको महत्त्वबारेमा जानकारी गराइएको छ । यस क्रममा २६ सरकारी विद्यालयका एक हजार ९४७ विद्यार्थीलाई अण्डा र मासुको महत्त्वबारे जानकारी गराइएको छ ।

यस्तै कार्यक्रम अन्तर्गत यही पुस १७ गते बिहान नेपाल कुखुरा व्यवसायी मञ्चको कार्यालयबाट प्रभातफेरी, भरतपुर महानगरपालिका–२ मा रक्तदान, सोही स्थानमा कुखुराको मासु र अण्डाका बारेमा जानकारी दिनका लागि एकदिने ‘चिकेन एण्ड एग फुड फेष्टिवल’को आयोजना गरिएको मञ्चले जनाएको छ ।

प्रकाशित मिति : १७ पुष २०८०, मंगलवार ०९:५०