मुगु जिल्लाको पूर्वीउत्तरी भेगमा पर्ने कार्मारोङ्ग गाउँपालिका–१ मा पर्ने हिमालको खोंचमा रहेको एक गाउँ चिसोकोे कारण देखाउँदै बसाई सरेपछि गाउँ नै मानवरहित भएको छ । वारिपारि ठुलाठुला हिमाल, बीच खोल्सामा बस्ती, जहाँ दिनको तिन घण्टा मात्र बस्तीमा घाम लाग्ने हुँदा चिसोको कारण २० वर्षदेखि स्थानीयले गाउँ छाडे ।

स्थानीयले गाउँ छाडेपछि मुगुको उच्च हिमाली बस्तीमा रहेको एउटा गाउँ डेढ दशकदेखि मानवरहित भएको हो । ७५ घरधुरी रहेको वाङग्री गाउँमा वर्षमा तीन महिना चैत्र, वैशाख, जेठमा मात्र घाम लाग्ने गरे पनि हिउँदमा भने दुई घण्टामात्र गाउँमा घाम लाग्ने गर्छ ।

साथै हिउँ जमिरहने भएपछि चिसो अत्याधिक हुने हुँदा गाउँमा बस्न कठिनाई झेल्नु परेकाले स्थानीय सिङ्गो गाउँवासी नै बस्ती सरेर जुम्लाको चौधविस, भारतको कुल्लुमनाली र केही काठमाडौंतिर बसाई सरेका हुन् । वैशाख, जेठ, असार महिना बाहेक अन्य महिना पाल्न चौपायलाई कठिनाई हुँदै आएको थियो ।

मान्छेलाई पनि चिसोले असर पार्दै जाने भएकाले उक्त गाउँमा भिरालो जमिन र खाद्यन्न उत्पादनमा आलु, फापर बाहेक केही नहुने हुँदा खाद्यान्न जोहो गर्न कठिनाई झेल्दै आएकाले बाध्य भएर गाउँ छाडेको स्थानीय वाङग्रीवासी गुरुछिरीङ तामाङले जानकारी दिए ।

गाउँलेहरुले जाडो छल्नकै लागि गएको ६० सालबाटै एक, दुई घरधुरी गरेर गाउँ छाड्दै जाँदा हाल आएर गाउँमा स्थानीयबासी शुन्य भएको तामाङले बताए । उनले बढी गाउँबासी जुम्लाको चौधबिसमा बसाई सरेको तामाङले बताए ।

उक्त वाङग्री गाउँ जिल्ला सदरमुकामदेखि दुई दिन पैदल यात्रामा पुगिन्छ । गाउँमा रहेको खेतीयोग्य जमिन बाँझिदै गएको छ भने घरहरु भत्किदै गइरहेका छन् । बसाई सरेर गए पनि चुनावमा मतदान गर्न र जडीवुटी संकलन गर्न गर्मी सिजनमा गाउँ आउने गर्छन् ।

साथै गाउँपालिकाको वडामा हुने विकास निर्माणको काम सम्पन्न गर्न जेठ महिनामा बस्तीमा एक महिनाका लागि मात्र गाउँले आउने गरेको कार्मारोङ गाउँपालिका अध्यक्ष छिरीङ क्याप्ने लामाले बताए । यहाँका वनपाखामा जडीवुटी तथा खनिज पचुर मात्रामा पाइने गर्दछ । साथै वन्यजन्तुको पछिल्लो समयमा वढ्दो चोरी शिकार हुने गरेको बताइएको छ ।