नेपाल विद्युत् प्राधिकरण अर्घाखाँची वितरण केन्द्रले अर्घाखाँची शितगङ्गा नगरपालिकामा रहेको शुभ श्री अग्नि सिमेन्ट उद्योगको विद्युत् लाइन काटेको छ । डेडिकेटेड लाइनमार्फत विद्युत् उपयोग गरे बापतको रकम नतिरेपछि लाइन काटिएको शाखाले जनाएको छ ।

शितगङ्गा नगरपालिका–८ जलुकेमा अवस्थित सो उद्योगले विद्युत् महसुल र जरिवाना बापतको रु ४७ करोड बक्यौता नतिरेपछि गत रातिदेखि लाइन काटिएको विद्युत् प्राधिकरण अर्घाखाँची शाखाका प्रमुख त्रिलोचन भट्टराईले जानकारी दिए । उद्योगले तिर्नुपर्ने विद्युत् महसुल तिर्न आनाकानी गरेपछि लाइन काटिएको हो ।

‘डेडिकेटेड एवं ट्रंक लाइनबाट अग्नि सिमेन्टले विद्युत् उपभोग गरिरहेको थियो,’ उनले भने, ‘पटक पटक खबर गर्दा अटेरी गरेपछि लाइन काटेका हौं ।’ प्राधिकरणले पुस १३ गतेदेखि विद्युत् लाइन काटेको हो । उद्योगले प्राधिकरणलाई करिब ४७ करोड रुपैयाँ भुक्तानी गर्न बाँकी रहेको प्राधिकरण प्रमुख भट्टराईले बताए ।