बाँके प्रशासनले बजार अनुगमनलाई दैनिक रुपमा तिब्रताका साथ अगाडि बढाईरहँदा उपभोक्ताको हित विपरीत कालोबजारी गरी उपभोक्ता ठग्ने व्यापारीको निद्रा हराएको छ भने् उपभोक्ता भने सरकार भएको अनुभूति गर्दै खुसी देखिएका छन् ।

बाँके प्रशासनले जिल्लाका विभिन्न क्षेत्रका बजारमा दैनिक रुपमा सशक्त अनुगमन गर्दै आएको छ । अनुगमनका क्रममा उपभोक्ताको हित विपरीत कार्य गरी उपभोक्ता ठगी गर्दै आएका व्यापारीहरुलाई कानून बमोजिम कारबाही समेत प्रशासनले गरेको छ ।

दैनिक अनुगमनको कार्यतालिका अनुसार जिल्ला प्रशासन कार्यालयका सहायक प्रमुख जिल्ला अधिकारी लालबहादुर गुरुङ नेतृत्वको सरोकारवाला निकायसहितको अनुगमन टोलिले बिहीबार नेपालगन्जका विभिन्न माछा तथा मासु विक्री गर्ने पसलहरुको अनुगमन गरेको छ ।

नेपालगन्जको जमुनाह र धम्बोझी बजारक्षेत्र आसपासका विभिन्न नौं वटा माछा तथा मासु पसल अनुगमन गर्दा छ वटा पसलले उपभोक्तालाई ठगी गरेको पाइएपछि तिनीहरुलाई कारबाही गरिएको बाँकेका प्रमुख जिल्ला अधिकारी श्रवणकुमार पोखरेलले जानकारी दिनुभयो ।

मो. सरिफ फ्रेश हाउसले बिल बिजक बिना कारोबार गरेको पाइएकाले तत्काल कारबाही स्वरुप २० हजार रुपियाँ जरीवाना गरिएको प्रजिअ पोखरेलले जानकारी दिनुभयो । उक्त पसलबाट खसीको मासु ७ किलो र कुखुराको मासु ३.८ किलो खान अयोग्य रहेको पाइएकाले जफत गरि नष्ट गरिएको थियो ।

प्रजिअ पोखरेलका अनुसार अल्लाह विष्मिल्लाह फ्रेश हाउसले पनि बिल बिजक बिना कारोबार गरेको पाइएकाले १० हजार रुपियाँ जरीवाना गरिएको थियो ।

सुफियाना फ्रेश हाउसबाट मङ्गुर माछा ३ किलो, कुखुराको मासु २.५ किलो र अन्य जातको माछा २९ किलो खान अयोग्य पाइएकाले जफत गरि नष्ट गरिएको तथा बिल बिजक बिना कारोबार गरेको पाइएकाले ५ हजार रुपियाँ जरीवाना गरी कारबाही गरिएको प्रजिअ पोखरेलले बताउनुभयो ।

हाम्रो फ्रेश हाउसबाट पनि खसीको मासु ११ किलो र कुखुराको मासु ३.५ किलो खान अयोग्य रहेको पाइएकाले जफत गरि नष्ट गरिएको तथा बिल बिजक बिना कारोबार गरेकाले २० हजार रुपियाँ जरीवाना समेत गराइएको उहाँले जानकारी दिनुभयो ।

त्यसैगरी जमुनाह बजार क्षेत्रमा खुल्ला रुपमा सडक पेटीमा माछा बेचिरहेका दुई जना विक्रेताले अनुगमन टोलिलाई देखेर भागी फरार भएको प्रजिअ पोखरेलले जानकारी दिनुभयो । विक्री स्थलबाट ३५ किलो माछा बरामद गरि नष्ट गरिएको थियो । सो स्थानबाट ८ हजार २ सय ८० रुपियाँ नगद, नोकिया मोबाइल एक थान, माछा काट्ने औजार र ढक तराजु दुई थान बरामद गरी मुचुल्कासहित स्थानीय जमुनाह प्रहरीलाई बुझाइएको प्रजिअ पोखरेलले जानकारी दिनुभयो ।

कुनै पनि बहानामा उपभोक्ताको स्वास्थ्य माथि खेलवाड गरी उपभोक्ता ठग्ने जो कोहीलाई पनि कानून अनुसार कारबाहीको दायरामा ल्याईने र उपभोक्ताको हित अनुसार काम गर्ने गरी दैनिक रुपमा प्रशासनको नेतृत्वमा सरोकारवाला निकायको सहभागितमा बजार अनुगमनलाई तिब्र रुपमा निरन्तरता दिईने प्रजिअ पोखरेलले बताउनुभयो ।