कारागारमा विपश्यना ध्यान शिविर सञ्चालन गर्ने सरकारी निर्णयको बौद्ध भिक्षु र बुद्धिजीविहरुले स्वागत गरेका छन् ।

काठमाडौंको संघराम विहारको ४२ औं स्थापना दिवसको अवसरमा भएको कार्यक्रममा उनीहरुले कैदीहरुलाई विपश्यना ध्यान शिविर कार्यान्वयनमा समेत जोड दिएका थिए ।

भिक्षु तपस्सीधम्म महास्थविर, प्राध्यापक मदनरत्न मानन्धर र बुद्धिजीवि केशवमान चित्रकार लगायतले कैदीहरुलाई सुधार्न विपश्यना ध्यान उपयुक्त हुने र सरकारले यस्तो ध्यान शिविरलाई निरन्तरता दिन सक्नु पर्ने बताए । गृहमन्त्रालयले हिजो कारागारहरुमा विपश्यना ध्यान शिविर संचालन गर्ने निर्णय गरेको थियो ।

कार्यक्रमा काठमाडौं महानगर पालिकाका प्रवक्ता नविन मानन्धरले बौद्ध समुदायले शिक्षा, स्वास्थ्य निशुल्क गरि रोजगारीको सृजना गरेर जेष्ठ नागरिकको सेवा गर्ने योजनाहरु गर्न सकिने बताउनुभयो ।

सो अवसरमा छैठौ संघनायक अश्वघोष महास्थविरले स्थापना गर्नुे भएको विहारमा योगदान गर्नु भएका सदस्यहरुलाई सम्मान पनि गरिएको थियो ।