विश्वलाई ठूलो मात्रामा हतियार बेच्ने मुलुक रुसले कुनै दिन आफूले पनि हतियारको अभाव भोग्नुपर्छ भन्ने कल्पना पनि गरेको थिएन । तर, एक अन्तर्राष्ट्रिय पत्रिकाको भर्खरैको रिपोर्टअनुसार युक्रेनविरुद्ध लामो युद्धमा फसेको रुसका लागि यस्तो समय आएको छ र पुटिनलाई यो संकटसँग जुध्न असाधारण कदम चाल्न बाध्य पारेको छ ।

वाल स्ट्रिट जर्नलको रिपोर्टका अनुसार रुसले युक्रेनविरुद्ध चलिरहेको युद्धमा आफ्नो स्थिति बलियो बनाउन पाकिस्तान, इजिप्ट, ब्राजिल र बेलारुस जस्ता देशहरूको सहायत लिनुपरेको छ । रिपोर्टका अनुसार रुसले यी देशहरूलाई आफूले बेचेका लडाकु र कार्गो हेलिकप्टरको इन्जिन फिर्ता गर्न आह्वान गरेको छ ।

वास्तवमा, रूसले युद्ध सुरु गरेदेखि नै हेलिकोप्टरहरू यसको सैन्य अपरेसनहरूको महत्त्वपूर्ण भाग भएको जनाएको छ । तर युद्धको सुरुवाती दिनमा रुसले सयभन्दा बढी हेलिकप्टर गुमाउनु परेको थियो । यस्तो अवस्थामा एकातिर रुसले हेलिकोप्टरको इन्जिन र स्पेयर पार्ट्सको उत्पादन तीव्र बनाएको छ भने अर्कोतर्फ अन्य देशबाट हेलिकोप्टर र स्पेयर पार्ट्स ल्याउन बाध्य छ ।

प्रतिवेदनका अनुसार रुसले भारत र आर्मेनिया जस्ता देशलाई बेच्ने हतियारको आपूर्ति पनि रोक्नुपरेको छ । रुस विश्वको दोस्रो ठूलो हतियार निर्यातकर्ता हो र धेरै दशकको कडा परिश्रमपछि विश्व हतियार बजारमा यो स्थान हासिल गरेको छ । तर युक्रेनसँगको युद्ध अहिले तानिएको छ र हतियारको अभावले रुसका लागि ठूलो चुनौती खडा गरेको छ ।

वाल स्ट्रिट जर्नलको रिपोर्ट अनुसार रुसले हतियार र स्पेयर पार्ट्सको उत्पादन बढाएको छ तर आफ्नो आवश्यकता पूरा गर्न नसकेको र रुसले अहिले विमान, हेलिकप्टर, मिसाइल र रक्षा खरिद गर्ने देशसँग सम्पर्क गरेको छ । सोही रिपोर्टका अनुसार यस वर्ष रुसले पाकिस्तान, बेलारुस र ब्राजिललाई बेचेका सैन्य र कार्गो हेलिकोप्टरको इन्जिन फिर्ता लिन वार्ता गरेको छ ।