शुक्रबार रातिको भूकम्पले क्षति पुर्याएको जाजरकोटका बस्तीमा सोमबार अपरान्ह अर्को शक्तिशाली भूकम्प गएको छ । जाजरकोटको बारेकोट गाउँपालिका–१ रामीडाँडा नै केन्द्रविन्दु भएर सोमबार ४ः३१ मा गएको ५.८ रेक्टर स्केलको भूकम्पले भेरी नगरपालिकामा धेरै घर भत्किएका छन् भने केही व्यक्ति घाइते भएका छन् ।

जाजरकोटको भेरी नगरपालिका वडा नं.१ राउतगाउँ र वडा नं.५ कालेगाउँमा रहेका घरहरू शुक्रबार रातिको भूकम्पले चर्काएकोमा सोमवार दिउँसो साढे ४ बजेपछि गएको भूकम्पले भत्काएको छ । शुक्रबारको भूकम्पले १२ जनाको मृत्यु भएको भेरी नगरपालिकाको राउतगाउँमा सोमबार ३ वटा घर भत्किएको छ ।

शुक्रबारको भूकम्पबाट जोगिएका धेरै घर सोमबारको भूकम्पले भत्काएको स्थानीय वीरबहादुर ओलीले जानकारी दिए । ‘यो भूकम्पले झन् जोखिम बढ्यो, घर नजिक बस्न पनि नसकिने भयौं,’ उनले भने । राउतगाउँमा भूकम्पमा परी एकजना घाइते भएका छन् । राउतगाउँ वरपरकै गाउँहरु भरावन र गैरी क्षेत्रमा पनि घरहरु भत्किएका छन् ।

शक्तिशाली भूकम्प आउँदा ठूलो आवाज आउनुका साथै गाउँभरि नै घर भत्किएर धुलो उडेको देखिन्थ्यो । ‘लामो समयसम्म हल्लायो, पहिले नभत्किएका घरहरु पनि अहिले भत्किए,’ स्थानीय बलवीर खत्रीले भने । भूकम्पले थप घरहरु भत्किएको र मानिस समेत घाइते भएको जानकारी पाएपछि अस्थायी प्रहरी पोस्ट राउतगाउँको टोली गाउँघरतिर गएको छ ।

शुक्रबार मध्यरातमा आएको शक्तिशाली भूकम्पले ठूलो धनजनको क्षति भएका बेला आज पनि सोही क्षेत्रमा शक्तिशाली भूकम्प गएपछि नागरिकहरु निकै त्रसित र तनावपूर्ण अवस्था छन् । आज गएको भूकम्पको झड्का काठमाडौं उपत्यकामा पनि महसुस गरिएको थियो । सोमवार अपरान्ह साढे ४ बजेर ३३ मिनेटको समयमा भूकम्पको झड्का महसुस गरिएको हो ।