बझाङमा जिप दुर्घटना हुँदा ६ जना घाइते भएका छन् । जिल्लाको छविस पाथिभेरा गाउँपालिका–७ खोरी स्थित कच्ची सडक खण्डमा जिप दुर्घटना हुँदा ६ जना घाइते भएका हुन् ।

भाडे बजार हुँदै बुडखोरी तर्फ गइरहेको सु.प.प्र.०१००१ ज १२६६ नम्बरको जिप आज (शुक्रवार) बिहान साढे १० बजे तीर ब्रेक फेल भएर सडकमा पल्टिएको जिल्ला प्रहरी कार्यालय बझाङले जनाएको छ । जिपमा आठ जना सबार रहेका थिए ।

आठ जना सवार मध्ये ६ जना घाइते भएका हुन् । घाइते हुनेमा छबिसपाथिभेरा गाउँपालिका–७ बड्खोरी का २५ वर्षीय ईनार महत ,३० वर्षीय प्रकाश धामी , २५ वर्षीय अशोक धामी, १६ वर्षीय निरज धामी ,१६ वर्षीय सन्तोष धामी र ३१ वर्षीय राम बहादुर धामी रहेका प्रहरीले जनाएको छ ।

घटना भएको जानकारी हुने बित्तिकै प्रहरी सहायक निरीक्षक गणेश दत्त भट्टको कमान्डमा ३ जनाको प्रहरी टोली गई घाइतेहरूलाई जिल्ला अस्पताल बझाङमा ल्याउन लागिएको प्रहरीले बताएको छ । चालक बुडखोरी बस्ने ३० वर्षीय बिनोद बहादुर धामीलाई प्रहरीले नियन्त्रणमा लिएको छ ।