सत्यपाटी
लुम्बिनी प्रदेशका अर्थमन्त्री धनबहादुर मास्की चढेको गाडी सोमबार दिउँसो दुर्घटनामा परेको छ ।
राप्ती राजमार्ग अन्तरगत तुलसीपुरबाट अमेलिया हुँदै देउखुरीस्थित मन्त्रालयतर्फ जाँदै गरेको लु १ झ ७३८ नम्बरको गाडी तुलसीपुर-१२ सितलपुरको घुम्तीमा दिउँसो चार बजेतिर दुर्घटनामा परेको हो ।
अर्थमन्त्री मास्कीका प्रेस संयोजक दीपक बोहराका अनुसार दुर्घटनामा अर्थमन्त्री मास्की, स्वकीय सचिव शम्भु पौडेल, पिएसो मनबहादुर थिडी, चालक मनबहादुर बंशी मगर सामान्ने घाइते भएका छन् ।
घाइते सबैको हात खुट्टामा सामन्य चोट लागेको छ । अर्थमन्त्रीसहित चारै जना घाइतेको राप्ती प्रादेशिक अस्पताल तुलसीपुरमा उपचार भइरहेको इलाका प्रहरी कार्यालय तुलसीपुरले जनाएको छ ।
सडकमा आएको बच्चा जोगाउने क्रममा गाडी सडकबाट बाहिर गएको चालकले बताएका छन् ।
प्रकाशित मिति : २०८० असोज २२ गते सोमबार
