भेरिगंगा नगरपालिका–१२, पाडुलेमा सोमबार दिउँसो ट्रकको ठक्करबाट एक जनाको मृत्यु भएको छ भने अर्का एक गम्भीर घाइते भएका छन् ।
सुर्खेतबाट नेपालगन्जतर्फ जाँदै गरेको ना.५ ख ५६०८ नम्बरको खाली ट्रकले छिन्चुबाट सुर्खेततर्फ आउँदै गरेको मोटरसाइकल (लु.प्र.०३००१ प.३६३१) लाई ठक्कर दिएको हो ।
दुर्घटनामा परी अन्दाजी २१–२२ वर्षीय एक पुरुषको प्रदेश अस्पताल, सुर्खेतमा उपचारको क्रममा मृत्यु भएको प्रहरीले जनाएको छ । उनको पहिचान भने खुलेको छैन ।
मोटरसाइकलमा सवार अर्का व्यक्ति १९ वर्षीय दमन शाही गम्भीर घाइते छन्। उनको माया मेडिकल, छिन्चुमा उपचार भइरहेको छ ।
ट्रक, ट्रक चालक र मोटरसाइकललाई नियन्त्रणमा लिई प्रहरीले अनुसन्धान थालेको इलाका प्रहरी कार्यालय छिन्चुका प्रमुख पदम खत्रीले बताए ।
प्रकाशित मिति : २०८२ असोज ६ गते सोमबार
