सूचनाको शक्ति - The Power Of Information

        

बर्दिया निकुञ्ज पीडितहरूको जिविकोपार्जनमा समस्या

३० औँ वन्यजन्तु सप्ताहको अवसरमा बर्दिया राष्ट्रिय निकुञ्जले वन्यजन्तु पीडित परिवारसँग अन्तरक्रिया गरेको छ । पीडित परिवारहरूले सरकारले वन्यजन्तु पीडितहरूलाई दिनुपर्ने सेवा सुविधा दिन नसकेको बताएका छन् ।

निकुञ्ज पीडित एकल महिलाहरूले अहिले जिविकोपार्जन गर्न समस्या भएको बताएका छन् । छोरा छोरीलाई लेख पढ गराउन, बेरोजगारी समस्या समाधानका लागि पहल गर्नु पर्ने पीडितहरूले बताएका छन् ।

पीडित भएको समयमा निकुञ्जले दिने भनेको सेवा सुविधा नदिएको पीडित शान्ती चौधरीले बताइन् । ‘पहिले यो यो सुविधा दिन्छौँ भन्ने तर पछि पीडितहरूलाई बिर्सँदै जान्छन्,’ उनले भनिन् ।

पीडित भएका परिवारहरू मध्ये एक जनालाई रोजगारी व्यवस्था गर्ने भने पनि त्यो निकुञ्जले पूरा गर्न नसकेको वन्यजन्तु पीडित एकल महिला समुहकी अध्यक्ष अमृता जैसीले बताइन् । वन्यजन्तुबाट घाईते भएकाहरूलाई थप उपचारका लागि समस्या भएको बताएका छन् ।

वन्यजन्तु पीडितहरूले निकुञ्ज आसपासको क्षेत्रमा बसोवास गर्दा अझै पनि जोखिम रहेको बताएका छन् । बर्दिया राष्ट्रिय निकुञ्जका निमित्त प्रमुख सरोजमणि पौडेलले सरकारले तोके अनुसारको सेवा सुविधा वन्यजन्तु पीडितलाई दिइरहेको बताउँदै रोजगारीका लागि क्षमता अनुसार व्यवस्थापन गर्ने कोसिस गरिरहेको बताए ।

बर्दिया राष्ट्रिय निकुञ्ज र राष्ट्रिय प्रकृति संरक्षण कोषले वन्यजन्तु पीडित महिला र घाइतेहरूलाई मासिक एक हजार ५०० रुपैयाँ भत्ता दिने गरेको छ । निकुञ्ज आसपासको क्षेत्रमा सात जना वन्यजन्तुको आक्रमणबाट घाइते भएका छन् भने २९ जना महिलाहरू वन्यजन्तुको आक्रमणबाट श्रीमान् गुमाएर एकल महिला भएका छन् ।

गत वैशाख १ गतेदेखि सुरु भएको वन्यजन्तु सप्ताहमा झण्डोत्तलन, हात्ती पूजा, राजमार्ग सरसफाइ, चरा अवलोकन, अग्नीरेखा सरसफाइ, पत्रकारहरूसँग अन्तरक्रिया लगायतका कार्यक्रमको आयोजना गरिएको छ ।

प्रकाशित मिति : ८ बैशाख २०८२, आइतवार १८:०४

लोकप्रिय