कर्णाली तथा सुदूरपश्चिम प्रदेशको प्रमुख व्यापारिक केन्द्र रहेको नेपालगन्जको ट्राफिक व्यवस्थापन निकै कमजोर देखिएको छ । नेपालगन्जका मुख्य बजार क्षेत्रका सडकमा सवारी जाम बढ्न थालेपछि सवारी दुर्घटनाको जोखिम बढेको छ । नेपालगन्जका मुख्य बजारका सडकको दायाँबायाँ मनपरी गरिने पार्किङले ट्राफिक व्यवस्थापन निकै फितलो छ ।

नेपालगन्जको त्रिभुवन चोक, गणेशमान चोक, चारबाहिनी, भेरी अस्पताल चोक, विपी चोक, धम्बोझी चोक, घरबारी टोल, त्रिवेणी मोड लगायतका सडक क्षेत्रमा जथाभावी हुने पार्किङले ट्राफिक व्यवस्थापनलाई गिज्याइरहेको छ । बजार क्षेत्रमा किनमेल गर्नेदेखि सरकारी कार्यालयका सेवाग्राही हिँड्डुल गर्दा मुख्य सडक छेउमा सवारी पार्किङ गर्ने क्रम बढेको छ ।

पसल, अस्पताल, बैंक, विद्यालय, सरकारी तथा गैरसरकारी संस्थाका कार्यालयसमेत रहेको नेपालगन्जमा सडकसँग जोडिएका व्यावसायीक प्रतिष्ठान तथा अस्पतालले पार्किङ क्षेत्र नबनाएकोले सडक क्षेत्र अतिक्रमण भइरहेको छ । पछिल्लो समय अटोरिक्साले थप जटिलता निम्त्याएका छन् । नेपालगन्जमा ३० हजार बढी अटोरिक्सा सञ्चालनमा रहेको अनुमान छ ।

नेपालगन्जका मुख्य बजारमै केन्द्रित हुने भएकोले अटोरिक्साले सवारी चाप बढाएका छन् । मोटरसाइकल र साना सवारी पार्किङका लागि स्थान छुट्टयाए पनि कार्यान्वयन नहुँदा समस्या भएको छ । अटोरिक्साको वृद्धिसँगै कमजोर ट्राफिक व्यवस्थापनले समस्या थपिएको छ । अधिकांश अटोरिक्सा चालकसँग चालक अनुमति पत्र पनि छैन ।

निजी प्रयोजनका लागि भन्दै लिएका अटोरिक्साहरुले समेत धमाधम यात्रु बोक्न थालेका छन् । मापदण्ड बिनै चलेका अटोरिक्साका कारण सडक दुर्घटनाको जोखिम उच्च छ । नेपालगन्जमा जहाँ पायो त्यहीँ यात्रु चढाउने र ओराल्ने गरेका छन् । नेपालगन्जको ट्राफिक अव्यवस्थित हुने गरी रिक्साहरु पार्किङ्ग गरिन्छ ।

सवारी चालक अनुमपति पत्र लिनुपर्ने, यात्रु दुर्घटना बिमा हुनुपर्ने, ट्राफिक नियम पालना गर्नुपर्ने, जहाँ पायो त्यहीँ रोकेर यात्रु भर्ना नपाइने लगायतका मापदण्डहरु अधिकांश अटोरिक्सा व्यवसायी तथा चालकहरुले पालना गरेका हुँदैनन् । ट्राफिक प्रहरीको निगरानी अभावले यहाँ ट्राफिक नियम पालना गर्ने चालकको संख्या निकै कम देखिन्छ ।

ट्राफिक निगरानी कमजोर हुँदा सडक दुर्घटनासमेत बढिरहेको नेपालगन्ज–१० का जनक बुढा बताउँछन् । ट्राफिकले कडा निगरानी नराखेकै कारण दुर्घटना बढिरहेको उनको आरोप छ । पछिल्लो समयमा अटोरिक्सा यात्रुका लागि सजिलो यातायातको साधन बनेको छ । यात्रुलाई सहज भए पनि अटोरिक्साले दुर्घटनाको जोखिम बढाएको छ ।

दुर्घटना बिमा नै नभएका अटोरिक्सा, लाइसेन्स नभएका चालक र अन्य सवारी साधनले मुख्य सडक क्षेत्रमै जथाभावी पार्किङ्ग गर्दासमेत ट्राफिक प्रहरीले नजर पुर्याउन नसक्दा जिल्लाकै ट्राफिक व्यवस्थापन कमजोर देखिएको छ । ट्राफिक प्रहरी पोष्ट नेपालगन्जको इन्चार्ज पाएका प्रविण आचार्यले ट्राफिक व्यवस्थापनलाई चुस्त बनाउन सकेका छैनन् ।

इन्चार्जको जिम्मेवारी पाएसँगै उनी असुली र सेटिङ्गमा माहिर देखिएका छन् । इन्चार्ज आचार्यले नेपालगन्जमा ट्राफिक व्यवस्थापनमा भन्दा टिप्पर, ट्रक तथा भारतीय नम्बर प्लेटका सवारीबाट रकम असुली गर्नेतर्फ बढी ध्यान दिएको स्रोत बताउँछ । गतिलो ट्राफिक व्यवस्थापन नहुँदा यतिबेला नगरका विभिन्न चोक, गल्ली तथा सडकहरु अस्तव्यस्त हुँदै गएका छन् ।

नेपालगन्ज क्षेत्रको ट्राफिक व्यवस्थापन दिनप्रतिदिन अस्तव्यस्त भइरहेको छ । पैदल यात्रीलाई हिँडडुल गर्नसमेत अप्ठेरो छ । विशेषगरी नेपालगन्जको सदरलाइन, त्रिभुवन चोक, सेतु विक चोकदेखि सुर्खेतरोड जाने बाटो, भेरी अस्पताल लगायतका क्षेत्रमा उचितरुपमा ट्राफिक व्यवस्थापन हुन सकेको छैन ।