गत भदौमा तीज मेला हेर्न जाँदा सामूहिक बलात्कार गरेका आठ जनाले त्यसयता पनि पटक पटक बलात्कार गरेको १४ वर्षीया किशोरीले प्रहरीलाई बताएकी छन् । मेरो ह्वाट्सएपमा मंसीर २४ मा एउटा मेसेज आयो । एक परिचितले भिडियो पठाएका रहेछन् । थिचें, हेर्नै नसकिने दृश्य थियो ।

भित्री वस्त्र मात्र लगाएकी एक किशोरी त्रस्त र बेसहारा हालमा देखिन्छिन् । शरीरभरि बालुवा–माटो दलिएको छ । ठाउँ हेर्दा कुनै खोला किनार जस्तो लाग्छ । छेउबाट कसैले मोबाइलको टर्च बालेर किशोरीतिर सोझ्याउँछ । उनी अनुहार छोप्छिन् । अर्को एक जनाले किशोरीको यौनांगको फोटो खिच्न मोबाइल नजीकै लैजान्छ । फोटो खिच्ने र टर्च बाल्ने दुवैको अनुहार देखिंदैन । तर कालो ज्याकेट लगाएको हात देखिन्छ ।

घुँडा धसेर बसेकी किशोरी एउटा हातले अनुहार र अर्को हातले लाज छोप्न प्रयासरत छिन् । पछाडि गुलाफी रङको चप्पल छ । त्यही वेला कसैले किशोरीको हात अनुहारबाट हटाउन खोज्छ । ४५ सेकेन्डको यो भिडियोमा आवाज छैन । यस्तो दर्दनाक दृश्य देखेपछि मैले भिडियो पठाउनेसँग विस्तृत कुरा सोधें ।

उनले ती किशोरीलाई सामूहिक बलात्कार भएको र यो भिडियो त्यसैको रहेको भनी सामाजिक सञ्जालमा आएको बताए । मलाई पत्याउन मुश्किल परिरहेको थियो । तिनै साथीले ती किशोरी बर्दियाकी रहेको भन्दै थप बुझ्न उनका आमा र मामाको मोबाइल नम्बर दिए । मैले किशोरीकी आमालाई फोन गरें ।

‘मलाई मंसीर १९ गते मेसेन्जरमा भिडियो आयो,’ उनले सुनाइन्, ‘ती मेरै जेठी छोरी थिइन् । मैले हेर्नै सकिनँ । आँशु थाम्नै सकिनँ ।’ किशोरीकी आमा छोरीलाई बर्दियामै छोडेर रसुवामा ज्यामी काम गर्दी रहिछन् । उनका एक छोरा र दुई छोरी छन् । आमासँगै काम गर्ने भनेर १४ वर्षीया जेठी छोरी दुई दिनअघि मात्र बर्दियाबाट रसुवा आएकी थिइन् ।

त्यो भिडियो देखेपछि आमा शुरूमा त केही बोल्नै सकिनन् । तर केही बेरपछि मन दह्रो पारेर छोरीलाई सोधिन् । तर छोरीले जे भनिन् त्यसले उनको मथिंगल हल्लियो । सपना हो कि विपना छुट्याउनै सकिनन् । गत भदौमा स्कूलमा सँगै पढ्ने साथीले किशोरीलाई तीज मेला हेर्न जाने प्रस्ताव गरिछन् । उनी राजी भइन् ।

त्यही वेला आफूलाई आठ जनाले बलात्कार गरेको छोरीले आमालाई सुनाइन् । ‘मैले थप सुन्न सकिनँ,’ ३५ वर्षीया आमाले पीडा सुनाइन्, ‘आमा–छोरी अँगालो हालेर निकैबेर रोयौं ।’ आँसु थामिएपछि आमाले बर्दियामा रहेका आफन्तलाई यो वज्रपातबारे सुनाइन् । आमा–छोरी भोलिपल्ट बर्दिया पुगे । त्यतिन्जेल आफन्तले घटनाबारे प्रहरीलाई जानकारी गराइसकेका रहेछन् ।

आमाले औपचारिक रूपमा जिल्ला प्रहरी कार्यालय, बर्दियामा जाहेरी दिएकी छन् । जिल्लाले अनुसन्धानको जिम्मा इलाका प्रहरी कार्यालय, मोतीपुरलाई दिएको रहेछ । मोतीपुरका प्रहरी निरीक्षक (इन्स्पेक्टर) रूपेश साहका अनुसार बालिकालाई गत भदौ २१ गते भट्टेखोलामा लगेर सामूहिक बलात्कार गरेको अनुसन्धानबाट खुलेको छ । घटनामा संलग्नताको आरोपमा आठ जनालाई नियन्त्रणमा लिइएको र तीन जना फरार रहेको साहले बताए ।

पक्राउ पर्नेमा पाँच जना १८ वर्षमुनिका छन् । प्रहरीका अनुसार सामूहिक बलात्कारपछि उनीहरूले भिडियोसमेत खिचेको खुलेको छ । उक्त भिडियो आरोपितमध्येका एक जनाले आफ्नो मिल्ने साथीलाई पठाएको र त्यसपछि बिस्तारै अन्य व्यक्तिसम्म पुगेको पाइएको छ । ‘अनि बालिकाको परिवारका सदस्यलाई समेत पुगेछ,’ प्रहरी निरीक्षक साहले भने । बलात्कारपछि चार जनाले भिडियो खिचेको प्रहरीले जनाएको छ ।

जबरजस्ती करणीपछि ‘दुनियाँलाई देखाइदिन्छु भन्दै उनीहरूले भिडियो खिचेको’ भनी भान्जीले आफूलाई सुनाएको बालिकाका मामाले बताए । मामाका अनुसार घटनाबारे अरूलाई भने ज्यान मारिदिने धम्की दिइएपछि किशोरी मनभित्रै पीडा गुम्स्याएर बसिरहेकी थिइन् । किशोरीले आफ्नो आर्थिक र पारिवारिक समस्याका कारणले पनि घटना कसैलाई भन्न नसकेको ती किशोरी बस्दै आएको स्थानका वडाध्यक्षले बताए ।

उनका अनुसार बालिकाका बा–आमा पारिवारिक कलहका कारण दुई वर्षदेखि अलग अलग बस्छन् । निम्न आर्थिक अवस्थाका कारण आमा ज्यामी काम खोज्दै रसुवा पुगेकी थिइन् । दुई छोरी र छोरा हजुरबुबा–हजुरअमासँग बस्दै आएका थिए । आठ कक्षामा पढ्ने किशोरी यो घटनापछि विद्यालय समेत जान छोडेको पाइएको वडाध्यक्षले बताए । किशोरीले उक्त समूहले आफूलाई पटक पटक बलात्कार गरेको प्रहरीलाई बताएकी छिन् ।

‘पाँच पटक यस्तो भएको भनेर बालिकाले बताएकी छिन्,’ प्रहरी निरीक्षक साह भन्छन्, ’हामी यसबारे थप अनुसन्धान गरिरहेका छौं ।’ प्रारम्भिक सोधपुछमा पक्राउ परेकाहरूले कसूरमा संलग्नता स्विकारिसकेको पनि उनले बताए । ‘एकातिर छोरीलाई आठ जनाले यस्तो गरेका छन्, अर्कातिर नांगै पारी भिडियो बनाएर दुनियाँभरि फैलाइदिएका छन्,’ आमाले गला अवरुद्ध पार्दै भनिन्, ‘ती अपराधीलाई कारबाही भए चित्त बुझाउने मेलो हुने थियो ।’