राष्ट्रिय स्वतन्त्र पार्टीका सभापति रवि लामिछानेलाई बुटवलको सुप्रिम सहकारीको बचत रकम अपचलन प्रकरण अन्तर्गत संगठित अपराधको अभियोगमा बयानका लागि आज रुपन्देही लगिँदैछ । रुपन्देही जिल्ला अदालतले ८ कात्तिकमा लामिछानेसहित १२ जनालाई संगठित अपराधमा पक्राउ गर्न अनुमति दिएको थियो ।

अदालतको अनुमति अनुसार सरकारी वकिलको कार्यालयमा बयानका लागि लामिछानेलाई रुपन्देही ल्याउन लागिएको हो । पोखराबाट बुद्ध एयरको विमानबाट आज बिहान रुपन्देही ल्याउन लागिएको रुपन्देहीका प्रहरी प्रमुख एसपी रन्जीतसिंह राठौरले बताए । यद्यपि भैरहवाको विमानस्थल बिहानमा नखुल्ने भएका कारण ल्याउन ढिलाइ हुनसक्ने राठौरको भनाइ छ ।

विमानस्थलबाट लामिछानेलाई सिधै भैरहवामा रहेको जिल्ला प्रहरी कार्यालयमा राखिने छ । त्यसपछि जिल्ला सरकारी न्यायधिवक्ताको कार्यालयमा लगिने छ । बुटवलको सुप्रिम सहकारीको रकम गैरकानुनीरूपमा गोर्खा मिडिया नेटवर्कमा सारिएको विषयमा नेटवर्कका तत्कालीन उपाध्यक्ष छविलाल जोशीसँग दुई दिन बयान लिएर पोखरा पठाइएको थियो ।

सुप्रिम सहकारीको रकम पनि लामिछाने प्रबन्ध–निर्देशक रहेको गोर्खा मिडिया प्रालिमा अपचलन भएको सहकारी सम्बन्धी संसदीय छानबिन समितिले ठहर गरेको थियो । बुटवलको सुप्रिम सहकारीबाट जोशीको नाममा दुई करोड ५० लाख र लामिछानेको नाममा एक करोड ९६ लाख रुपैयाँ गोर्खा मिडिया नेटवर्क प्रालिमा गएको संसदीय विशेष छानबिन समितिको प्रतिवेदनमा छ ।

जोशी र लामिछानेसहित जीबी राई, भूपेन्द्रबाबु राई, कुमार रम्तेल र गोर्खा मिडिया नेटवर्कका नाममा गरी सुप्रिम सहकारीबाट १४ करोड २९ लाख ३६ हजार रुपैयाँ रकम पठाइएको छानबिन समितिको प्रतिवेदनमा उल्लेख छ । यस्तै लामिछानेलाई बुटवल ल्याइने भएपछि सरकारले रुपन्देही र आसपासको सुरक्षा व्यवस्था कडा पारेको छ ।

रुपन्देहीस्थित गौतमबुद्ध अन्तर्राष्ट्रिय विमानस्थल वरपर सुरक्षा संवेदनशीलता बढाइएको छ, जहाँ नेपाल प्रहरी र सशस्त्र प्रहरीका जवानहरूलाई व्यापक रूपमा परिचालन गरिएको छ । लामिछानेलाई पोखराबाट उडानमार्फत ल्याउने तयारी गरिएको भए पनि विमानस्थलमा खराब मौसमका कारण उडान ढिला भइरहेको जनाइएको छ ।

लामिछानेलाई रुपन्देही ल्याउने भएसँगै रास्वपाका समर्थकहरू भैरहवामा प्रदर्शनको तयारीमा जुटेका छन् । रास्वपाले आफ्ना कार्यकर्ताहरूलाई बिहान १० बजे भैरहवामा उपस्थित हुन निर्देशन दिएको थियो । लामिछानेको समर्थनमा प्रदर्शनको तयारी भइरहेका बेला सहकारी पीडितहरूले सरकारी वकिलको कार्यालय अगाडि विरोध प्रदर्शनको योजना बनाइरहेका छन् ।

यसले दोहोरो प्रदर्शनको सम्भावना बढाएको छ । यही घटनाक्रमलाई मध्यनजर गर्दै सुरक्षामा थप कडाइ गरिएको हो । विमानस्थलदेखि सरकारी वकिलको कार्यालयसम्म सुरक्षा व्यवस्था मजबुत पारिएको छ । प्रहरी प्रशासनले कुनै पनि अप्रिय घटना हुन नदिनका लागि सतर्कता अपनाएको जिल्ला प्रहरी कार्यालय रुपन्देहीले जनाएको छ ।