डुडुवा गाउँपालिकाले छात्रा प्रोत्साहन कार्यक्रम अन्तर्गत एसइई पास गरेका छात्राहरुलाई साइकल वितरण गरेको छ । घरदेखि टाढा बजारसम्म गएर उच्च शिक्षा हासिल गर्न सहजता तथा उत्प्रेरणाका लागि गाउँपालिका अन्तर्गतका सामुदायिक विद्यालयहरुका छात्रालाई साइकल वितरण गरिएको हो ।
२०७९ सालमा एसइई पास गरेका गाउँपालिकाका ७ वटा माध्यमिक विद्यालयका ९२ जना छात्रालाई साइकल वितरण गरिएको शिक्षा शाखाका स्रोत व्यक्ति राम एकबाल मण्डलले बताए । आज पालिका कार्यालयमा आयोजित एक समारोहका बीच साइकल वितरण गर्दै गाउँपालिका अध्यक्ष नरेन्द्रकुमार चौधरीले किशोरीहरुलाई उच्च शिक्षा हासिल गर्न प्रोत्साहन गरेको भन्दै भोलीका दिनमा उच्च शिक्षा हासिल गर्न टाढा तथा बजारसम्म आउजाउ गर्न मद्दत पुग्ने बताए ।
उनले विशेषगरी मधेशी समुदायका किशोरीहरु साधारण कक्षा पढेपछि विभिन्न कारणले उच्च शिक्षा हासिल गर्न नसकेको समस्यालाई यो कार्यक्रमले अन्त्य गर्ने विश्वास व्यक्त गरे । अध्यक्ष चौधरीले शिक्षा भनेको उज्यालोको प्रकाश भएकाले बालबालिकालाई शिक्षातर्फ विशेष ध्यान दिनुपर्नेमा जोड दिँदै पालिकाभित्र संचालित विद्यालयहरुमा शैक्षिक गुणस्तरियताका लागि पहिलो चरणमा आधारभूत विद्यालयलाई सिसी क्यामरामार्फत निगरानी सुरु गरिएको बताए । उनले डुडुवाले संस्कार शिक्षालाई जोड दिँदै आगामी शैक्षिक सत्रबाट स्थानीय पाठ्यक्रम तयार गरी लागू गर्न लागेको बताए । आ–आफ्नो घरमा नैतिकतासंगै संस्कारको बाताबरण तयार गर्न यो शिक्षा दिन लागेको उनको भनाई छ ।
कार्यक्रममा उपाध्यक्ष शाहिदा बानो, वडा अध्यक्षहरु दुर्गाप्रसाद बर्मा, आमोद तिवारी, प्रमुख प्रशासकीय अधिकृत गिरबहादुर सेजुवाल, विभिन्न विद्यालयका शिक्षक, अभिभावक, विद्यार्थी लगायतको सहभागिता रहेको थियो । साइकल वितरण कार्यक्रममा नेकपा एमालेबाट निर्वाचित वडा अध्यक्षसहितका जनप्रतिनिधिहरुले कार्यक्रमलाई विथोल्ने प्रयास गरेका थिए । कार्यक्रममा एक्कासी प्रबेश गरेर अनावश्यक विवाद सिर्जना गरी कार्यक्रम विथोल्ने प्रयास गरेको अध्यक्ष चौधरीले बताए । अध्यक्ष चौधरीले भने, ‘राजनीतिक विवादका विषयमा छलफल गर्नुछ भने मसंग समय लिनुस् अनि बसेर संवाद गरौं, यसरी औपचारिक कार्यक्रमलाई भाँड्न पाइँदैन ।’
उनले सबै समस्याको अन्त्य छलफलमार्फत हुने भएकाले संवादमा जानुपर्नेमा जोड दिँदै सामाजिक सञ्जालमार्फत विभिन्न किसिमका झुठा आरोप लगाएर अरुलाई पनि भ्रममा पार्ने काम नगर्न आह्वान गरे । उनले भने, ‘गाउँपालिकाले अहिलेसम्म गरेको विकास तथा राम्रा कामहरु सबै जनतासामु छर्लङ्ग छ, विश्वास लाग्दैन भने फिल्ड गएर हेर्नुस् ।’
समाचारको लागि
फोन : ०८१-५९०५०९, ९८५८०४००६४, ९८५८०७४२५०
Email : [email protected], [email protected]
विज्ञापनका लागि
Phone : ०८१-५९०५०९, ९८५८०४००६४, ९८५८०७४२५०
Email : [email protected]
अध्यक्ष-सम्पादक : काशीराम शर्मा
कार्यकारी निर्देशक : विष्णु सापकोटा
कार्यकारी सम्पादक : शोभा केसी
Copyright © All right reserved to Satyapati.com. Site By: Aarush Creation
Design : Aarush Creation
सत्यपाटी संवाददाता । बाँके