२०८३ कात्तिक ३० , सोमबार 16, November 2026, Monday

बाँके निकुञ्जका पाँच वटै सफारी रुट सञ्चालनमा

पाटेबाघ लगायत विभिन्न जनावर अवलोकनका लागि सबैभन्दा राम्रो मानिएको बाँके राष्ट्रिय निकुञ्जमा पछिल्लो समय पर्यटकको सङ्ख्या बढ्दै जाँदा निकुञ्जका पाँच वटै जङ्गल सफारी रुट सञ्चालनमा ल्याइएको छ । निकुञ्जका पाँच वटै सफारी रुट सञ्चालनमा आएसँगै पाटेबाघ, चौका, हात्ती, विभिन्न प्रजातिका चराचुरुङ्गी तथा अन्य वन्यजन्तु अवलोकनको सम्भावना थप फराकिलो बनेको बाँके राष्ट्रिय निकुञ्जले जनाएको छ ।

बाँके राष्ट्रिय निकुञ्जका प्रमुख संरक्षण अधिकृत वीरेन्द्र कँडेलले पछिल्लो समयमा पाटेबाघ लगायतका जनावर तथा चरा अवलोकन गर्न आउने पर्यटकको सङ्ख्या बढ्दै गएकाले निकुञ्जका पाँच वटै सफारी रुट सञ्चालन गरिएको बताए । उनले सफारीका सबै रुट सञ्चालनमा आएसँगै जिल्लाको पर्यटन प्रवर्द्धन र पर्यटकको बसाइ अवधि बढाउन बाँकेका तारे होटेल तथा पर्यटन व्यवसायीसँग छलफल भइरहेको बताए ।

प्रमुख संरक्षण अधिकृत कँडेलका अनुसार निकुञ्जको प्राकृतिक सुन्दरता, जैविक विविधता र वन्यजन्तुलाई पर्यटकीय उत्पादनका रूपमा विकास गर्ने उद्देश्यले नेपालगन्ज र कोहलपुरका होटेल व्यवसायीले एकीकृत ‘सफारी प्याकेज’ निर्माणको पहल पनि थालेका छन् । होटेल एसोसिएसन नेपाल (हान), बाँके च्याप्टर र नाट्टा बाँकेसँगको पहलमा आन्तरिक तथा बाह्य पर्यटक, विशेषगरी भारतीय पर्यटकलाई लक्ष्य गरिएको नाट्टा बाँकेका अध्यक्ष डिल्लीराज रेग्मीले बताए ।

उनका अनुसार प्रस्तावित प्याकेजमा होटेलदेखि निकुञ्जसम्मको यातायात, अनुभवी प्रकृति पथप्रदर्शक, जिप सफारी, निकुञ्ज प्रवेश शुल्क र स्थानीय परिकारको स्वाद लगायतका सेवा समेट्ने योजना छ । उनका अनुसार बाँके आउने पर्यटकलाई एक दिनका लागि मात्र सीमित नराखी कम्तीमा दुई दिनसम्म बस्ने वातावरण निर्माण गर्न आवश्यक छ ।

नेचर गाइड एसोसिएसन बाँकेका अध्यक्ष भीमबहादुर डाँगीका अनुसार बाँके राष्ट्रिय निकुञ्ज भौगोलिक बनावट र जैविक विविधताका हिसाबले अन्य निकुञ्जभन्दा पृथक छ । यहाँ चुरे पहाड, भावर क्षेत्र, ठुला रूख तथा विभिन्न जडीबुटीजन्य वनस्पति पाइने भएकाले प्रकृतिप्रेमी पर्यटकका लागि विशेष आकर्षण रहेको उनले बताए । बाँके राष्ट्रिय निकुञ्ज मुख्यत: पाटेबाघको संरक्षणका लागि स्थापना गरिएको हो ।

यहाँ हाल ५१ वटा पाटेबाघ रहेको तथ्याङ्क छ । लेजर प्रविधि तथा सिसिटिभीको सहायताबाट बाघ अनुगमन गरिँदै आएको उनले जानकारी दिए । नेचर गाइड डाँगीका अनुसार बाँके राष्ट्रिय निकुञ्जमा तीन सयभन्दा बढी प्रजातिका चराचुरुङ्गी, ५५ प्रजातिका माछा, २४ प्रजातिका सरीसृप, ३४ प्रजातिका स्तनधारी तथा नौ प्रजातिका उभयचर पाइन्छन् । नेपाल र भारतमा मात्र पाइने चौका यहाँको विशिष्ट वन्यजन्तु आकर्षणमध्ये एक हो ।

प्रकाशित मिति : २०८३ कात्तिक ३० गते सोमबार