राष्ट्रिय स्वतन्त्र पार्टीका सांसद खगेन्द्र सुनारले जेनजी आन्दोलनका क्रममा ज्यान गुमाएका युवाका आमालाई सम्बोधन गरेका छन् । आन्दोलनका एक वर्ष पूरा भएको अवसरमा मंगलबार आयोजित कार्यक्रमलाई सम्बोधन गर्दै उनले भने, ‘आमा तिमिलाई लागेको होला मेरो गर्भबाट जन्मिएको छोरो मर्यो । म एक्लो पर्यो । हैन आमा तिम्रो छोरो मरेको हैन, उ त यो देशमा यस्तो बिउ बनेर रोपिएको छ, त्यहीबाट नयाँ सुशासनको वृक्ष बनेर उम्रिएको छ ।’
सबै आमालाई सम्बोधन गर्दै उनले भने, ‘तिम्रो गर्भबाट सपुतले बास गरेको हो । तिम्रो गर्भमा नायकले बास गरेको हो । आफ्नो गर्भलाई धन्यवाद भन । म तिम्रो गर्भलाई यहाँबाट प्रणाम गर्न चाहन्छु । स्याबास आमा ! धन्यवाद आमा ! जसले सहिद जन्माउनुभयो । प्रत्येक आमाहरूको पाउ छोएर म प्रणाम गर्न चाहन्छु । तिम्रो छोरो ढल्यो, यो देश उठ्यो । तिम्रो छोरोले गोली खायो र यो देशले सिटामोलको गोली खान पाएको हो ।’ आफू आलो काँचो भए पनि कुहिएको नभएको बताउँदै उनले सुखले बाँच्ने दिन आउने उनले बताए ।
