सत्यपाटी
आफ्नै दल राष्ट्रिय स्वतन्त्र पार्टी (रास्वपा)का सांसदले संसद्मै सरकारको कार्यशैलीमाथि प्रश्न उठाएपछि प्रधानमन्त्री बालेन्द्र शाह (बालेन)ले भावुक अभिव्यक्ति दिएका छन् । शुक्रबार राति ११ बजेर ६ मिनेटमा सामाजिक सञ्जाल फेसबुकमार्फत प्रधानमन्त्री शाहले सही समय आउन केही समय लाग्ने भन्दै आम नागरिकलाई नआत्तिन आग्रह गरेका छन् ।
उनले आफूले सुनेको र देखेकोभन्दा वास्तविकता फरक हुन सक्ने उल्लेख गर्दै अहिलेको परिस्थितिमा धैर्य गर्न आग्रह गरेका छन् । ‘केही समय लाग्छ, सही समय आउनलाई। ढिला होला, तर गलत हुँदैन । नआत्तिनुहोस् । सुनेको र देखेकोभन्दा वास्तविकता कहिलेकाहीँ फरक हुन सक्छ,’ उनले लेखेका छन् ।
प्रधानमन्त्री शाहले आफूले कहिलेकाहीँ एक्लै लड्नुपर्ने अवस्था आउन सक्ने संकेतसमेत गरेका छन् । ‘कहिलेकाहीँ एक्लै लड्नुपर्छ । यो पहिलोचोटि होइन,’ उनले भनेका छन् । प्रधानमन्त्री शाहले यस्तो अभिव्यक्ति दिएको केही घण्टाअघि मात्रै प्रतिनिधिसभा बैठकमा उनकै दल रास्वपाका सांसद मनिष झाले सरकारको कार्यशैलीप्रति असन्तुष्टि जनाएका थिए ।
सांसद झाले राज्य सञ्चालनमा सरकारले अपेक्षित ढंग पुर्याउन नसकेको टिप्पणी गर्दै सरकारको कामकारबाहीमाथि प्रश्न उठाएका थिए । सत्तारुढ दलकै सांसदबाट संसद्मा सरकारको आलोचना भएपछि प्रधानमन्त्री शाहको मध्यरातको यो अभिव्यक्तिलाई अर्थपूर्ण रूपमा हेरिएको छ । प्रधानमन्त्रीको स्टाटसले सरकारभित्रै असन्तुष्टि बढेको हो कि बाहिर देखिएको आलोचनाभन्दा परिस्थिति फरक छ भन्ने बहसलाई थप बल दिएको छ ।
