सत्यपाटी
नेपाल आयल निगमअन्तर्गत कोसी प्रादेशिक कार्यालय, विराटनगरका लागि पेट्रोलियम पदार्थ ढुवानी गर्दै आएको नविन ढुवानी सेवा प्रा.लि.को ट्यांकरबाट पेट्रोल चोरी भएको घटना सार्वजनिक भएको छ । निगमका अनुसार को १ ख ६१९० नम्बरको ट्यांकरले भारतीय आयल कर्पोरेसनको सिलिगुडी डिपोबाट २० हजार लिटर पेट्रोल लोड गरी ल्याएको थियो ।
उक्त ट्यांकर असार ७ गते बिहान विराटनगरस्थित डिपो नजिकैको कञ्चनबारी पार्किङमा राखिएको थियो । तर, असार ८ गते बिहान ट्यांकर पार्किङ स्थलबाट हराएको जानकारी ढुवानीकर्ताले निगमलाई दिएको थियो । त्यसलगत्तै नेपाल आयल निगमले जिल्ला प्रहरी कार्यालय मोरङलाई जानकारी गराउँदै खोजी कार्य सुरु गरेको थियो ।
सीसीटीभी फुटेजको अध्ययन गर्दा ट्यांकर असार ८ गते बिहान ३ बजेर ३ मिनेटमा पार्किङ स्थलबाट बाहिरिएको र नोबेल अस्पतालतर्फ गएको देखिएको थियो । त्यसपछि निगम, प्रहरी र ढुवानीकर्ताका प्रतिनिधिले संयुक्त रूपमा खोजी अभियान सञ्चालन गरेका थिए । खोजीका क्रममा ट्यांकर विराटनगरबाट करिब १७ किलोमिटर टाढा सुनसरीको भोक्राहा गाउँपालिका–८ अन्तर्गत हुलाकी राजमार्ग क्षेत्रमा बेवारिसे अवस्थामा फेला परेको थियो ।
ट्यांकरको सिल तथा ताला काटिएको अवस्थामा भेटिएपछि जिल्ला प्रहरी कार्यालय सुनसरी, निगमका कर्मचारी तथा ढुवानीकर्ताका प्रतिनिधिको उपस्थितिमा मुचुल्का तयार गरी थप अनुसन्धान प्रक्रिया अघि बढाइएको थियो । असार १० गते जिल्ला प्रशासन कार्यालय मोरङ, जिल्ला प्रहरी कार्यालय मोरङ, पत्रकार, निगम तथा ढुवानीकर्ताका प्रतिनिधिको रोहवरमा ट्यांकरको सिल खोली पेट्रोलको गुणस्तर र परिमाण परीक्षण गरिएको थियो ।
परीक्षणका क्रममा पेट्रोलको गुणस्तर सामान्य रहेको पाइए पनि २० हजार लिटरमध्ये ९७३ लिटर पेट्रोल चोरी भएको पुष्टि भएको निगमले जनाएको छ । ट्यांकरमा बाँकी रहेको १९ हजार २७ लिटर पेट्रोल निगमको भण्डारणमा सुरक्षित रूपमा खाली गरिएको छ । साथै निगमको पेट्रोलियम पदार्थ ढुवानी विनियमावली–२०७३ अनुसार चोरी भएको पेट्रोलको परिमाण बराबरको दोब्बर रकम ढुवानीकर्ताबाट असुल गरिएको निगमले जनाएको छ ।
