२०८३ मंसिर २ , बुधबार 19, November 2026, Thursday

आरजुलाई बयानमा बोलाउँदै अख्तियारले टास्यो खण्डहर घरमा म्याद

ई–पासपोर्ट खरिद अनियमितता प्रकरणमा परेको उजुरीमा अख्तियार दुरुपयोग अनुसन्धान आयोगले तत्कालीन परराष्ट्रमन्त्री डा.आरजु राणा देउवालाई बयानमा उपस्थित हुन म्याद पठाएको छ । अख्तियार स्रोतले डा.राणालाई अनुसन्धानका लागि म्याद तामेल भएको पुष्टि गरेको छ । अख्तियार राणाको बूढानीलकण्ठस्थित खण्डहर घरमा पुगेर म्याद टाँसेर फर्किएको छ ।

‘एक दिनअघि नै रितपूर्वकको म्याद टाँसेर टोली फर्किएको जानकारीमा आएको छ,’ अख्तियार स्रोतले भन्यो, ‘पासपोर्ट छपाइबारे बयानका लागि हाजिर हुन आउने भन्ने छ ।’ तत्कालीन परराष्ट्रमन्त्री डा.राणा विदेशमा रही सम्पर्कमा नभएको भन्दै अख्तियारले खण्डहरमा परिणत भएको घरमा पुगेर म्याद तामेल गरेको हो ।

वडाका प्रतिनिधिहरूको रोहबरमा म्याद तामेली गरिएको थियो । म्याद तामेली प्रक्रियामा देउवा परिवारका कुनै सदस्य भने सामेल नभएको जनाइएको छ । अख्तियारले पासपोर्ट छपाइ खरिद प्रक्रियामा राणाको संलग्नताको आशंकासहित बयानका लागि म्याद तामेल गरेको हो । अख्तियारमा पासपोर्ट छपाइको ठेक्कापट्टा प्रक्रियामा डा. राणाको संलग्नता रहेको दाबीसहित उजुरी परेको छ । अहिले उजुरीमाथि प्रारम्भिक अनुसन्धान भइरहेको छ ।

अख्तियारले पासपोर्ट छपाइ अनियमितता सम्बन्धी उजुरीमा छानबिनका लागि राहदानी विभागका महानिर्देशक तीर्थराज अर्याल, सूचना प्रविधि निर्देशक सुनीलकुमार केसी र विभागका तत्कालीन लेखा प्रमुख तुलसीप्रसाद आचार्यलाई नियन्त्रणमा लिएर अनुसन्धानका लागि विशेष अदालतबाट थुना अनुमति लिएको छ ।

प्रकाशित मिति : २०८३ असार ४ गते बिहीबार