२०८३ मंसिर ४ , शुक्रबार 20, November 2026, Friday

काम नगर्ने निर्माण कम्पनीलाई बबई सिँचाइ आयोजनाको अल्टिमेटम

बबई सिँचाइ आयोजनाले ठेक्का सम्झौता अनुसार काम पूरा नगर्ने एक निर्माण कम्पनीलाई पाँच करोड ३३ लाख रुपैयाँभन्दा बढी रकम सरकारी खातामा दाखिला गर्न ३५ दिने अल्टिमेटम दिएको छ । आयोजनाले वैशाख ४ गते एक सूचना जारी गर्दै गुलरिया, बर्दियाको अमन कन्स्ट्रक्सन कम्पनीलाई उक्त रकम बुझाउन निर्देशन दिएको हो ।

सूचना अनुसार कम्पनीले पाँच करोड ३३ लाख ४२ हजार ९६.७ रुपैयाँ सरकारी बाँकी सरह बुझाउनुपर्ने छ । यसअघि आयोजनाले २०८२ साल चैत २ गते २१ दिनको समय दिएर पत्र काटे पनि कम्पनीले हालसम्म रकम दाखिला नगरेको आयोजनाले जनाएको छ । आयोजनाले दिएको ३५ दिनको समय सीमा भित्र तोकिएको बैंक खातामा रकम जम्मा गरी सक्कल भौचर पेस नगरेमा कडा कानुनी प्रक्रिया अपनाइने चेतावनी दिइएको छ ।

निर्धारित समयमा रकम नआएमा आर्थिक कार्यविधि तथा वित्तीय उत्तरदायित्व ऐन, २०७६ र नियमावली २०७७ बमोजिम कुमारी चोक तथा केन्द्रीय तहसिल कार्यालय मार्फत सरकारी बाँकी सरह असुल उपर गर्ने प्रक्रिया अगाडि बढाइने आयोजना जनाएको छ । आयोजना र अमन कन्स्ट्रक्सनबीच आर्थिक वर्ष २०७७–०७८ मा विभिन्न चार वटा ठेक्का सम्झौता भएका थिए ।

तर, कम्पनीले सम्झौता अनुसार काम नगरेपछि सार्वजनिक खरिद ऐन, २०६३ को दफा ५९ बमोजिम ती सम्झौताहरू रद्द गरी कम्पनीलाई कालो सूचीमा राख्ने निर्णय भएको थियो । आयोजनाको उक्त निर्णय विरुद्ध निर्माण कम्पनीले उच्च अदालतमा मुद्दा दायर गरे पनि अदालतले रिट खारेज गरिदिएको थियो । अदालतबाट रिट खारेज भएसँगै आयोजनालाई बाँकी काम अन्य प्रक्रियाबाट गराउँदा लाग्ने थप लागत रकम साबिकको निर्माण कम्पनीबाटै असुल गर्ने बाटो खुलेको हो ।

प्रकाशित मिति : २०८३ वैशाख ४ गते शुक्रबार