यही फागुन २१ गते हुने प्रतिनिधिसभा सदस्य निर्वाचनका लागि उम्मेदवारी दर्ता गराएका तीन हजार ४०६ प्रत्यक्ष उम्मेदवारमध्ये हालसम्म एक हजार २१३ जनाले मात्रै बैंक खाता खोलेको निर्वाचन आयोगले जनाएको छ ।
निर्वाचनमा सहभागी ६८ राजनीतिक दलमध्ये नौं दलले मात्र खाता खोलेका छन् । खाता खोल्ने दलहरूमा नेपाली कांग्रेस, राष्ट्रिय जनमोर्चा, नेकपा संयुक्त, नेपाल कम्युनिष्ट पार्टी (नेकपा), नेपालका लागि नेपाली पार्टी, जनता समाजवादी पार्टी, संयुक्त नागरिक पार्टी, मितेरी पार्टी र नेपाल जनता संरक्षण पार्टी रहेका छन् ।
आयोगका सहायक प्रवक्ता कुलबहादुर जिसीका अनुसार निर्वाचनमा राजनीतिक दल तथा उम्मेदवारले प्राप्त गर्ने आर्थिक सहयोगको पारदर्शिता कायम गर्न, खर्चको सीमा पालना गराउन र प्रभावकारी निगरानीका लागि बैंक खाता खोल्ने व्यवस्था गरिएको हो ।
‘प्रतिनिधिसभा सदस्य निर्वाचन प्रचारप्रसार बैंक खाता (सञ्चालन तथा व्यवस्थापन) कार्यविधि, २०८२’ अनुसार आयोगमा दर्ता भई समानुपातिक तथा पहिलो हुने निर्वाचित हुने प्रणालीअन्तर्गत उम्मेदवारी दिएका सबै दल, दलका उम्मेदवार र स्वतन्त्र उम्मेदवारले निर्वाचन प्रचारप्रसार सम्बन्धी आम्दानी–खर्च सोही खातामार्फत सञ्चालन गर्नुपर्ने प्रावधान छ । सोही व्यवस्था अनुसार दल र उम्मेदवारले खाता खोल्दै गएका हुन् ।
