रवि र बालेनबीच मध्यरातमा ‘बृहत् एकता’ (सहमति पत्रसहित)

अन्तत लामो कसरतपछि राष्ट्रिय स्वतन्त्र पार्टी (रास्वपा) र काठमाडौँ महानगरपालिकाका मेयर बालेनबीच मध्यरातमा सात बुँदे सहमति भएको भएको छ । सहमति अनुसार रास्वपा सभापति रवि लामिछाने पार्टी सभापति रहनेछन् भने बालेन रास्वपाका तर्फबाट फागुन २१ को निर्वाचनमा प्रधानमन्त्रीका उम्मेदवार हुनेछन् । दुई जनाबीच रातभर भएको वार्तापछि आइतबार बिहानै ‘बृहत् एकता’सम्बन्धी सहमति पत्रमा हस्ताक्षर भएको हो ।

सो सहमतिपछि हर्षित हुँदै सहमतिका लागि काम गरेका रास्वपा उपसभापति डा.स्वर्णिम वाग्लेले अब बालेन्द्र शाह रास्वपाको नेता भएको भन्दै खुसी व्यक्त गरेका छन् । सहमतिको तस्वीर शेयर गर्दै डा वाग्लेले लेखेका छन्, ‘बालेन्द्र शाह अब रास्वपा नेता । आज बिहान ४ बजेर १५ मिनेटमा रास्वपा सभापति रवि लामिछाने र काठमाडौँ महानगरपालिकाका प्रमुख बालेन शाहबीच बृहत् एकता सम्बन्धी सहमति भएको छ ।’

बालेनले लेखे, ‘शुभ प्रभात !’

आगामी निर्वाचनमा मिलेर जाने विषयमा राष्ट्रिय स्वतन्त्र पार्टीसँग सघन संवाद गरिरहेका काठमाडौँका मेयर बालेन्द्र शाह बालेनले आइतबार बिहानै रवि लामिछानेसँग एउटै टेबलमा बसेर हस्ताक्षर गर्दै गरेको तस्वीर सार्वजनिक गरेका छन् । तस्वीरले दुई जनाबीच लिखित सहमति भएको संकेत गरेको छ । बालेनले क्याम्पसनमा यत्तिमात्र लेखेका छन्, ‘शुभ प्रभात !’

यस्तो छ सहमति

राष्ट्रिय स्वतन्त्र पार्टी (रास्वपा) तथा बालेन्द्र शाहबीच ‘बृहत् एकता’ सम्बन्धी सहमति

सबै नेपालीको समतामूलक उन्नतिप्रति कटिबद्ध सामाजिक न्याय सहितको उदार अर्थतन्त्रमा विश्वास गर्ने बहुलवादी लोकतान्त्रिक प्रणालीभित्र असल शासन कायम गरी आम नागरिकका आकांक्षा सम्बोधन गर्न सबै सुसंस्कृत एवं परिवर्तनकामी राजनीतिक शक्तिहरुबीच सहकार्य हुन अपरिहार्य रहेको तथ्यलाई आत्मसात गर्दै, २०८२ साल भदौ २३ र २४ को जेनजी आन्दोलन लगायत विभिन्न कालखण्डमा भएका जनआन्दोलनहरुका शहीद एवं घाइतेहरुको बलिदानलाई प्रेरणादायी स्मृतिमा राख्दै, समान अठोट बोकेका शक्तिहरुको सहकार्य मार्फत राष्ट्रसेवाको साझा लक्ष्य हासिल गर्न राष्ट्रिय स्वतन्त्र पार्टी (पहिलो पक्ष) र श्री बालेन्द्र शाह (दोश्रो पक्ष) बीच देहायका सहमति भएको छ ।

१. नवयुवाहरुले भ्रष्टाचार र कुशासन विरुद्ध गरेको आन्दोलनको अपनत्व लिई, घाईते तथा शहिद परिवारका मागहरुको यथोचित सम्वोधन गर्ने प्रतिवद्वता जनाउने ।

२. समुन्नति र सामाजिक न्यायका राष्ट्रिय उद्देश्यहरुका लागि गरिनु पर्ने गहिरा नीतिगत, संस्थागत एवं संरचनात्मक सुधारहरु मार्फत आर्थिक–सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम–आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने ।

३. पहिलो पक्ष र दोश्रो पक्षबीच बृहत् एकता भए पश्चात् स्थापित हुने राजनीतिक दलको नाम ‘राष्ट्रिय स्वतन्त्र पार्टी, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति, दलको चुनाव चिन्ह ‘घण्टी र केन्द्रीय कार्यालय काठमाडौँ उपत्यकामा रहने ।

४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने ।

५. बृहत् एकता पश्चात् पार्टीको संगठनात्मक संरचनालाई थप सक्षम र फराकिलो बनाउन युवा अभियन्ता एवं अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने ।

६. आसन्न आमनिर्वाचन लगत्तै यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने ।

७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह ‘घण्टी’मा गोलबद्ध भइ लोकतान्त्रिक सुशासन, समुन्नति र सामाजिक न्यायका मुद्धा अघि बढाउन अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिहरुलाई आव्हान गर्ने ।