२०८३ मंसिर ४ , शुक्रबार 20, November 2026, Friday

‘यौन दुराचारी’ एप्स्टिनसँग ट्रम्पले गरे आठ पटक सँगै विमान यात्रा

यौन दुराचारी जेफ्री एप्स्टिनसँग अमेरिकी राष्ट्रपति डोनाल्ड ट्रम्पले कम्तीमा आठपटक सँगै विमान यात्रा गरेको दाबी गरिएको छ । अमेरिकी न्याय विभाग (डीओजे)को वेबसाइटमा जारी ताजा दस्तावेजहरूमा ट्रम्पले कम्तीमा आठपटक एप्स्टिनको निजी जेटबाट उनको भर्जिन आइल्यान्डको निजी टापुसम्म यात्रा गरेको दाबी गरिएको छ ।

यी भ्रमण उडानहरू सन् १९९३ देखि १९९६ सम्मका भएको बताइएको छ । यो खुलासापछि अमेरिकी राजनीति र सञ्चारमाध्यमहरूमा बहस तीव्र भएको छ । एप्स्टिनले उनको निजी टापुमा नावालिक युवतीहरू तस्करी गरी उच्च बर्गका मानिसहरूलाई उपलब्ध गराइ यौनजन्य गतिविधि गराउने गरेको आरोप लागेको थियो ।

दस्तावेजहरूका अनुसार यो जानकारी २०२० जनवरी ७ को एक आन्तरिक इमेलमा आएको थियो, जसमा ट्रम्पले एप्स्टिनको निजी जेटमा पहिले बताइएको भन्दा धेरैपटक यात्रा गरेको पाइएको भनिएको छ । यो इमेल ‘रेम एपस्टिन फ्लाइट रेकर्डस’ विषयमा पठाइएको थियो । यद्यपि, इमेल पठाउने र प्राप्त गर्ने व्यक्तिको नाम गोप्य राखिएको छ ।

तर, यो दक्षिणी न्युयोर्क जिल्लाको एक सहायक अमेरिकी अभियोजकको हस्ताक्षर भएको बताइएको छ । इमेल अनुसार, ट्रम्प कम्तीमा आठ उडानहरूको यात्री सूचीमा दर्ता थिए । तीमध्ये चार उडानहरूमा नाबालिग युवतीहरूको तस्करी गरेको आरोपमा अहिले जेल परेकी घिस्लाइन म्याक्सवेल पनि सँगै थिइन् ।

दस्तावेजमा केही यात्राहरूमा ट्रम्पसँग उनकी तत्कालीन पत्नी मार्ला म्यापल्स, छोरी टिफनी र छोरा एरिक ट्रम्प पनि रहेको उल्लेख छ । एक उडानमा केवल एप्स्टिन र ट्रम्प नै यात्री थिए भने अर्को उडानमा एप्स्टिन, ट्रम्प र एक २० वर्षीय व्यक्ति थिए, जसको नाम गोप्य राखिएको छ ।

डीओजेको पक्ष र ट्रम्पको सफाई

यी दस्तावेजहरू सार्वजनिक भएपछि अमेरिकी न्याय विभागले हालका फाइलहरूमा ट्रम्पविरुद्ध केही असत्य र भ्रामक दाबीहरू पनि भएको स्पष्ट पारेको छ । डीओजेले यी आरोपहरू सन् २०२० को अमेरिकी चुनावअघि नै एफबीआईलाई पठाइएका र तिनमा कुनै ठोस आधार नभएको भनेको छ ।

विभागले उडानहरूमा नाम हुनु कुनै अपराधको प्रमाण नभएको बताएको छ । ट्रम्पले उनले एप्स्टिनसँग सन् २००४ तिर सम्बन्ध तोडिएको र गलत काममा उनको कुनै भूमिका नभएको निरन्तर भन्दै आएका छन् । यो इमेल करिब आठ हजार दस्तावेजहरूको भाग हो, जसलाई अमेरिकी न्याय विभागले एप्स्टाइन फाइल्स ट्रान्सपरेन्सी ऐनअन्तर्गत सार्वजनिक गरेको हो ।

यी फाइलहरूमा सयौं अडियो–भिडियो रेकर्डिङहरू र अगस्ट २०१९ को निगरानी फुटेज पनि समावेश छ । एप्स्टिन जेलमा मृत भेटिएका थिए । एप्स्टिनकी सहयोगी घिस्लेन म्याक्सवेललाई सन् २०२२ मा नाबालिगहरूको तस्करी र यौन शोषणका मुद्दामा २० वर्षको सजाय सुनाइसकिएको छ । यी नयाँ दस्तावेजहरूले अमेरिकामा पुराना मुद्दाहरू र राजनीतिक आरोप–प्रत्यारोपहरूलाई फेरि बल्झाएको छ ।

स्रोत : बीबीसी
प्रकाशित मिति : २०८२ पुस ९ गते बुधबार