२०८३ मंसिर ४ , शुक्रबार 20, November 2026, Friday

हेलिपोर्ट भ्रष्टाचार : क्यानका महानिर्देशक प्रदीप अधिकारी थुनामा

भक्तपुरको नलिन्चोकमा हेलिपोर्ट निर्माणमा साढे १३ करोडभन्दा बढी भ्रष्टाचार गरेको अभियोगमा नेपाल नागरिक उड्डयन प्राधिकरण (क्यान)का महानिर्देशक इन्जिनियर प्रदीप अधिकारीलाई विशेष अदालतले पुर्पक्षका लागि थुनामा पठाउने आदेश दिएको छ ।

विशेष अदालतका न्यायाधीशद्धय हेमन्त रावल, डिल्लीरत्न श्रेष्ठ र विदुर कोइरालाको इजलासले थुनामा पठाउने आदेश दिएको हो । त्यस्तै, सोही मुद्दाका अर्का प्रतिवादी तत्कालीन निर्देशक मुरारी भण्डारीलाई पाँच लाख धरौटीमा छोड्ने आदेश भएको अदालतका सूचना अधिकारी यज्ञराज रेग्मीले जानकारी दिए ।

अख्तियार दुरुपयोग अनुसन्धान आयोगले गत बुधबार महानिर्देशक अधिकारीसहित सात जनाविरुद्ध १३ करोड ५७ लाख ४६ हजार २१३ रुपैयाँ बिगो दाबीसहित विशेष अदालतमा मुद्दा दायर गरेको थियो । मुद्दामा छ जना व्यक्ति र एक परामर्शदाता कम्पनीलाई प्रतिवादी बनाइएको छ ।

साढे १७ करोड लागत अनुमान गरिएको उक्त हेलिपोर्ट हालसम्म पूर्ण रूपमा सञ्चालनमा आउन सकेको छैन। त्रिभुवन अन्तर्राष्ट्रिय विमानस्थलबाट करिब १५ किलोमिटर पूर्वमा रहेको यो हेलिपोर्ट गत असार ७ गते (२०८१) देखि सीमित रूपमा व्यावसायिक सञ्चालनमा ल्याइएको भए पनि सुरक्षित र उपयुक्त नभएको ठहर गरिएको छ ।

अख्तियारको अनुसन्धानबाट हेलिपोर्ट सञ्चालन योग्य नभएको, असुरक्षित स्थानमा निर्माण गरिएको, लाभ–लागत विश्लेषणबिना अत्यधिक रकम खर्च गरिएको, कानुनको पालना नगरी बदनियतपूर्ण ढंगले आयोजना अघि बढाइएको र प्रक्रियागत त्रुटि भएको पुष्टि भएको जनाइएको छ। परिणामस्वरूप सार्वजनिक सम्पत्तिको ठूलो हानि–नोक्सानी भएको अख्तियारको निष्कर्ष छ ।

प्रकाशित मिति : २०८२ मंसिर २१ गते आइतबार