२०८३ मंसिर ४ , शुक्रबार 20, November 2026, Friday

दुई महिनापछि बाँकेमा राहदानी वितरण सुचारु

जेनजी आन्दोलनको बेला गत भदौ २४ गते जिल्ला प्रशासन कार्यालय बाँकेमा आगजनी गरेर ध्वस्त पारिएपछि रोकिएको राहदानी वितरणको कार्य दई महिनापछि पुनः सुरु गरिएको छ । बाँकेका प्रमुख जिल्ला अधिकारी दिलकुमार तामाङले आगजनीबाट ध्वस्त भएको राहदानी शाखाको मर्मत सम्भार गरेर नयाँ उपकरणहरू जडान गरी राहदानी वितरण सुरु गरिएको बताए ।

उनले जिल्ला प्रशासनबाट प्रदान गरिने सेवाहरूमध्ये राष्ट्रिय परिचयपत्र नागरिकता वितरणको काम केही समयअघिनै सुरु गरिसकिएको जनाउँदै बाँकी रहेकोमध्ये राहदानी वितरण प्रक्रिया पनि सुरु गरिएको बताए । जिल्ला प्रशासन कार्यालय बाँकेमा गत भदौ २४ गते जेनजी आन्दोलनको क्रममा आगजनी भएपछि कार्यालयको भवन, भौतिक सामग्री, कागजात जलेर नष्ट भएपछि केही समयसम्म सबै सेवा ठप्प भएको थियो ।

हाल आएर राहदानी सेवा नियमित सुचारु भएको तथा अन्य सबै सेवाहरू पनि छिट्टै सुचारु गर्ने गरी काम भइरहेको जिल्ला प्रशासन कार्यालय बाँकेले जनाएको छ । जनेजी आन्दोलनपछि सेवा बन्द भएका बाँकेका कार्यालयहरूमध्ये मालपोत कार्यालयले अझै सेवा सुचार गर्न सकेको छैन भने जिल्ला र उच्च अदालतले केही दिन अघि सेवाहरू सुचारु गरेको छ । सोही प्रकारले यातायात व्यवस्था कार्यालयले पनि सेवा सुरु गरेको जनाएको छ ।

प्रकाशित मिति : २०८२ कात्तिक २२ गते शनिबार