नेपालगन्ज उपमहानगरपालिकाले रत्न राजमार्ग अन्तरगत सुर्खेतरोडको बिपी चोकदेखि धम्बोजी चोकसम्म सडकको दुवैतर्फको नालादेखि सात फिट भित्र पर्ने सबै संरचना हटाउन १५ दिने अल्टिमेटम दिएको छ ।
उपमहानगरपालिकाले मङ्गलबार सार्वजनिक सूचना प्रकाशित गरेर सुर्खेत रोडको बिपी चोकदेखि धम्बोझी चोकसम्मको फुटपाथ निर्माण तथा वृक्षारोपणस्थल निर्माण गर्ने भएको जनाउँदै सो सडकको दुबैतर्फको सात फिट भित्र निर्माण गरिएका टहरा, होर्डिंङ बोर्ड लगायतका सबै सरंचना १५ दिनभित्र हटाउन अल्टिमेटम दिएको हो ।
नेपालगन्ज उपमहानगरपालिकाका प्रमुख प्रशासकीय अधिकृत रामहरि शर्माद्धारा हस्ताक्षरित सो सुचनामा तोकिएको अवधीभित्र उक्त संरचनाहरू नहटाइए कार्यालयले हटाउने र त्यसबाट हुने क्षतिको जिम्मेवार सम्बन्धित व्यक्ति आफै हुनुपर्ने र हटाउँदा लाग्ने खर्च समेत सम्बन्धित व्यक्तिबाट असुल गरिने जनाइएको छ ।
उपमहानगरपालिकाका प्रमुख प्रशासकीय अधिकृत शर्माले सुर्खेतरोडको निर्धारित क्षेत्रको सडकको दुबैतर्फको नालादेखि सात फिटभित्र पर्ने टहरा, होर्डिङ बोर्ड, पोल, पर्खाल वा जुनसुकै संरचना भए पनि मङ्सिर २ गतेसम्म आफैँ हटाउन सूचना जारी गरिएको बताए ।
उनले हटाउँदा भएको सबै नोक्सानीको जिम्मेवार संरचना धनी आफै हुने र हटाउने खर्च स्थानीय सरकार सञ्चालन ऐन, २०७४ को दफा ४५ (४) बमोजिम जरिवाना सहित असुल गरिने पनि बताए । पैदलयात्रीलाई सुरक्षित फुटपाथ र हरियाली दिन उपमहानगरले तत्काल काम थाल्ने जनाएको छ । यो सडक नेपालगन्जको मुख्य प्रवेशद्वार हो, जसलाई सुन्दर र व्यवस्थित बनाउने लक्ष्य रहेको उपमहानगरले जनाएको छ ।