सरकारले यस वर्ष समयमै धानको समर्थन मूल्य निर्धारण गरे पनि बाँकेमा धान खरिदमा ढिलाई भएकोे तथा समर्थन मूल्यमा व्यापारीले धान खरिद नगर्दा किसानले सस्तोमै धान बिक्री गरिरहेका छन् । सरकारले आर्थिक वर्ष २०८२–०८३ का लागि मोटा धानको समर्थन मूल्य प्रतिक्विन्टल तीन हजार ४६३ रुपैयाँ ८१ पैसा तोकेको छ भने मध्यम धानको मूल्य प्रतिक्विन्टल तीन हजार ६२८ रुपैयाँ ३३ पैसा तोकेको छ ।
तर कम्पनीले बाँकेमा अझैसम्म धान खरिद सुरु नगरेको हुँदा किसानले बजारमा व्यापारीलाई बाध्य भएर प्रतिक्विन्टल करिब ९०० रुपैयाँ कम मूल्यमा धान बिक्री गरिरहेको जनाएका छन् । कम्दी बाँकेका किसान राजन मौर्यले सरकारले समर्थन मूल्य तोकेपनि सो मूल्यमा खाद्य व्यवस्था तथा व्यापार कम्पनीले हालसम्म खरिद सुरु नगरेको र व्यापारीले नौ सय रुपियाँ कममा खरिद गरिरहेकाले आफुहरु समस्यामा परेको बताए ।
उनले सरकारले तत्काल सबै किसानको धान समर्थन मूल्य अनुसार खरिद गर्नुपर्ने र व्यापारीलाई पनि सोही मुल्यमा खरिद गर्न कडाई गर्नु पर्ने माग गरे । व्यापारीले समर्थन मूल्यभन्दा निकै कममा धान खरिद गरे पनि कुनै प्रकारको अनुगमन वा निरीक्षण नभएको किसानहरुको गुनासो छ । धान खरिदमा ढिलाई गरिँदा सरकारले तोकेको मूल्य नपाएपछि आफुहरुले बाध्य भएर ९०० रुपैयाँ कम मूल्यमा बजारमा धान बिक्री गर्नुपरेको बाँके नौबस्ताका किसान शंकर थारुले दुखेसो गरे ।
बाँके बनकटवाका किसान दिपेन्द्र चौधरीले धान खरिदमा ढिलाई गरिएकाले किसानलाई ठुलो समस्या भएको बताए । उता, बाँकेका निमित्त प्रमुख जिल्ला अधिकारी पूर्ण खत्रीले सरकारले तोकेको भन्दा बढि मूल्यमा धान खरिद गर्ने कार्य व्यापारीले गरिरहेको गुनासो सुनिएको जनाउँदै सो बारेमा अनुगमन सुरु गरिने बताए । यसैबिच, खाद्य व्यवस्था तथा व्यापार कम्पनी लिमिटेडको नेपालगन्जस्थित कार्यालयलले यस वर्ष २० हजार क्विन्टल धान खरिद गर्ने जनाएको छ ।
खाद्य व्यवस्था तथा व्यापार कम्पनी लिमिटेडका प्रमुख रामशरण लामिछानेले कार्यालयले मोटा धान १५ हजार क्विन्टल र पाँच हजार क्विन्टल मध्यम धान खरिद गर्ने गरी कोटा निर्धारण भएर बिहीबार मात्रै आएको जानकारी दिए । उनले गत वर्ष नेपालगन्जमा मध्यम धान २५ हजार क्विन्टल र मोटा धान सात हजार क्विन्टल गरेर ३२ हजार क्विन्टल धान खरिद गरेको सो कार्यालयले यस वर्ष २० हजार क्विन्टल मात्र धान खरिदको कोटा आएको बताए ।
