२०८३ मंसिर ४ , शुक्रबार 20, November 2026, Friday

तीन वटा रातो बत्ती बाल्दै कोशी ब्यारेजका ५६ वटै ढोका खोलियो

अविरल वर्षातका कारण सप्तकोशी नदीमा पानीको वहाव बढ्दै गएपछि कोशी ब्यारेजका ५६ ढोका खोलिएका छन् । जिल्ला प्रहरी कार्यालय सुनसरीका प्रहरी प्रवक्ता योगराज खतिवडाले पानीको बहाव बढेसँगै ब्यारेजका ५६ वटै ढोका खोलिएको बताए ।

कोशी ब्यारेजमा पानीको वहाव प्रतिसेकेण्ड चार लाख ३१ हजार ५२५ क्युसेक बहाव मापन गरिएको छ । यो खतराको तहभन्दा माथि हो । प्रहरी प्रवक्ता खतिवडाका अनुसार बिहान ९ः४५ सम्ममा बहाव उच्च देखिएको छ ।

आज बिहान ७ः०० बजे सो नदीको जलवहाव मापन गर्दा दुई लाख ७१ हजार ३१० क्यूसेक पुगेपछि ३९ ढोका खोलिएकोे थियो । यसअघि शनिबार बेलुका ८ः०० बजे पानीको प्रवाह मापन गर्दा एक लाख ९३ हजार ६० प्रतिसेकेण्ड पाइएपछि १५ ढोका खोलिएको थियो ।

कोशी ब्यारेजमा पानीको प्रवाह एक लाख ५० हजार क्युसेक नाघेपछि खतराको सङ्केतस्वरूप रातो बत्ती बाल्ने गरिन्छ । कोशीमा तीन लाख क्युसेक बहाव पुगेपछि खतराको तह पार गरेको मानिन्छ । ब्यारेज कन्ट्रोल रुमका अनुसार खतराको सूचकका रूपमा तीन वटा रातो बत्ती बालिएको छ ।

सुनसरी, मोरङ र झापा सहितका तराई भेगहरूमा नदीहरूको बहाव बढेसँगै डुवानको स्थिति सिर्जना भएको छ । प्रहरीका अनुसार धेरै स्थानमा आवागमन अवरुद्ध भएको छ भने जोखिम क्षेत्रका बासिन्दालाई सतर्क रहन आग्रह गरिएको छ । ‘नजिकको बस्ती उठाएर सुरक्षित स्थानमा सारिएको छ,’ प्रहरी प्रवक्ता खतिवडाले भने ।

प्रकाशित मिति : २०८२ असोज १९ गते आइतबार