जेनजीको समर्थनमा हरिबंशले लेखे, ‘युवा पुस्तालाई हस्तान्तरण गर्नु नै उत्तम’

वरिष्ठ हाँस्यकलाकार हरिबंश आचार्यले जेनजीले आज गर्न लागेको प्रदर्शनप्रति ऐक्यवद्धता जनाउँदै आज उठेको आवाज कुनै व्यवस्थाविरुद्वको आवाज नभई यो व्यवस्था हाकिराखेका सबै दलका नेता र कर्मचारीको कार्यमाथिको प्रश्नका रुपमा उठेको बताएका छन् ।

उनले सामाजिक सञ्जाल फेसबुकमार्फत भनेका छन्, ‘जनताले तपाईंहरुबाट अहिले गरिराख्नु भएको भन्दा धेरै आशा गरेका छन् । अब उमेर भएकाले आफ्नो कार्य क्षमता सुधार्ने र उमेर पुगेकाले युवा पुस्तालाई हस्तान्तरण गर्नु नै उत्तम हुनेछ ।’

हरिबंशले फेसबुकमा के लेखे ?

Gen Z पुस्ता

मेरो घर छेउको बाटो पिच गरेको केही समयमै भत्कियो । म हरेक दिन मनमा सोच्दै थिए यो बाटो यति चाँडो कसरी भत्कियो ? हरेक दिन त्यही बाटो हिँड्छु तर सोच्छु मात्र । तर अहिलेको पुस्ता यस्ता प्रश्न मनभित्र मात्र सोच्दैनन् । प्रश्न उठाउँछन्, जनताको करले बनेको बाटो किन भत्कियो ? कसरी भत्कियो ? यसको जिम्मेवारी कसको ? यो एउटा सानो उदाहरण मात्र हो आजका पुस्ताले प्रश्न गरेका छन् ।

आज उठेको आवाज कुनै व्यवस्थाविरुद्वको आवाज होइन, तर यो व्यवस्था हाकिराख्नु भएका सबै दलका नेता र कर्मचारीको कार्यमाथिको प्रश्न हो । जनताले तपाईंहरुबाट अहिले गरिराख्नु भएको भन्दा धेरै आशा गरेका छन् । अब उमेर भएकाले आफ्नो कार्य क्षमता सुधार्ने र उमेर पुगेकाले युवा पुस्तालाई हस्तान्तरण गर्नु नै उत्तम हुनेछ ।