सत्यपाटी
संयुक्त राज्य अमेरिकामा सार्वजनिक भएको पछिल्लो मुद्रास्फीति (महँगी) सम्बन्धी तथ्यांक र अमेरिका, मेक्सिको तथा युरोपेली संघबीच चलिरहेको भन्सार वार्ताको पर्खाइका बीच सुनको मूल्यमा बृद्धि देखिएको छ ।
बुधबार बिहान ०४ः०१ जीएमटीसम्ममा स्पट गोल्डको मूल्य ०.४ प्रतिशतले बढेर प्रति औँस ३,३३४.१२ अमेरिकी डलर पुगेको छ भने अमेरिकी गोल्ड फ्युचर्स ०.१ प्रतिशतको हल्का वृद्धिसँगै प्रति औँस ३,३४०.९० डलरमा कारोबार भइरहेको छ ।
यो वृद्धिको पछाडि जुन महिनामा अमेरिकी उपभोक्ता मूल्यहरू पछिल्ला पाँच महिनामै सबैभन्दा तीव्र रूपमा बढेको तथ्यांक प्रमुख कारण मानिएको छ । केही वस्तुहरूको मूल्यवृद्धिले महँगीको दर चुलिएको हो, जसमा प्रस्तावित नयाँ भन्सार शुल्कले समेत भूमिका खेलेको हुन सक्ने विश्लेषकहरूको भनाइ छ ।
‘सुन अहिले थोरै ओरालो झुकावसहितको समायोजन अवस्थामा छ, विशेष गरी डलर बलियो हुँदै गएको कारण,’ सिंगापुरस्थित गोल्डसिल्भर सेन्ट्रलका प्रबन्ध निर्देशक ब्रायन लानले भने । ‘तर अमेरिका अझै विभिन्न देशहरूसँग भन्सार सम्बन्धी वार्ता गरिरहेको छ । बजारमा अझै धेरै अनिश्चितता छ, जसका कारण धेरै लगानीकर्ता सुरक्षित गन्तव्यतर्फ आकर्षित भइरहेका छन् ।’
अमेरिकी राष्ट्रपति डोनाल्ड ट्रम्पले हालै मेक्सिको र युरोपेली संघबाट आयात हुने वस्तुहरूमा आगामी अगस्ट १ देखि ३० प्रतिशत भन्सार लगाउने चेतावनी दिएका थिए । तर सोमबार उनले आफ्नो धारणा केही नरम बनाउँदै वार्ता जारी राख्ने संकेत दिए ।
मुद्रास्फीति रिपोर्ट सार्वजनिक भएपछि राष्ट्रपति ट्रम्पले उपभोक्ता मूल्यहरू अझै कम नै रहेको दाबी गर्दै फेडरल रिजर्भलाई ब्याजदर घटाउन आग्रह गरे । उता डलास फेडरल रिजर्भ बैंककी प्रमुख लोरी लोगानले भने सम्भावित महँगी नियन्त्रण गर्न फेडले अहिलेको ब्याजदरलाई केही समय यथावत् राख्नुपर्ने संकेत दिइन् ।
यद्यपि सुनको मूल्यमा सुधार देखिए पनि बलियो डलर र उचाइमा रहेको अमेरिकी ट्रेजरी प्रतिफलले सुनको मागमा केही दबाव देखिएको छ । बलियो डलर हुँदा अन्य मुद्राको तुलनामा सुन महँगो बन्न जान्छ, जसले अन्तर्राष्ट्रिय माग घटाउँछ ।
अब लगानीकर्ताको ध्यान बुधबार सार्वजनिक हुने अमेरिकी उत्पादक मूल्य सूचकांकमा केन्द्रित छ, जसबाट भविष्यको मौद्रिक नीति र महँगीको प्रवृत्तिबारे थप संकेत प्राप्त हुने अपेक्षा गरिएको छ ।
अन्य बहुमूल्य धातुहरूको मूल्य पनि उकालो लागेको छ । स्पट चाँदी ०.३ प्रतिशतले बढेर प्रति औँस ३७.८२ डलर पुगेको छ, प्लेटिनम ०.२ प्रतिशतले बढेर १,३७९.४६ डलर पुगेको छ भने प्यालेडियम ०.४ प्रतिशतले बढेर १,२१०.६६ डलरमा कारोबार भइरहेको छ ।
