सत्यपाटी
नेकपा (एमाले) ले ३२ वर्षे उमेर हद लगाएर नेताहरूको एउटा पंक्तिलाई पाखा लगाएर कीर्तिपुरमा भइरहेको अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) महाधिवेशनले निर्वाचनबाटै नेतृत्व छान्ने निश्चित भएको छ ।
एमालेले ३२ वर्षे उमेर हद लगाएपछि भइरहेको निर्वाचनमा सर्वसम्मत नेतृत्व छान्ने कोसिसमा एमाले थियो । त्यही अनुसार महाधिवेशन हलमा निर्वाचन कमिटीले अध्यक्ष र महासचिवसहितको नाम सुनाएपछि विद्यार्थीहरू विरोधमा उत्रिएका थिए ।
विद्यार्थीहरूले चर्को विरोध गर्दै निर्वाचनमा जानुपर्ने माग गरेपछि एमालेले बुधबारका लागि निर्वाचन कार्यक्रम सार्वजनिक गरेको छ । एमाले अध्यक्ष केपी शर्मा ओली, महासचिव शंकर पोखरेल र जनसंगठन समन्वय संयन्त्र संयोजक भानुभक्त ढकालले निर्वाचनमा जान नदिई सर्वसम्मत नेतृत्व छान्न हस्तक्षेप गरेपछि नाराबाजी भएको थियो ।
बन्द सत्रमा अध्यक्ष मण्डलले सर्वसम्मति भन्दै एमाले नेता ढकालले अध्यक्षमा डा.सुजन कडरिया, उपाध्यक्ष प्रकाश पौडेल र अन्जना शिवाकोटी साथै महासचिव दीपक धामीको नाम प्रस्ताव गरेका थिए । तर सहमति नजुटेपछि निर्वाचन समितिले कार्यतालिका सार्वजनिक गरेको हो ।
यसअघि एमाले अध्यक्ष ओली र महासचिव पोखरेलले समेत अनेरास्ववियुको नेतृत्व सर्वसम्मत चयन गर्न निर्देशन दिएका थिए । तर, अध्यक्षका दाबेदार प्रकाश पौडेल र दीपक धामी पक्षले चुनावको नाराबाजी गरे । टाँसिएको कार्यतालिका अनुसार उम्मेदवारको दर्ता फारम मंगलबार ३ देखि ५ बजेसम्म वितरण गर्ने, ४ देखि ६ बजेसम्म दर्ता गर्ने उल्लेख छ ।
मतदान भोलि बिहान १० बजेदेखि ५ बजेसम्म हुने उल्लेख छ । ३२ वर्षमुनिका मात्रै महाधिवेशनमा सहभागी भए पनि एमाले नेतृत्वले हस्तक्षेप गरेर सर्वसम्मत नेतृत्व चयन गर्न खोजेपछि कीर्तिपुरस्थित अनेरास्ववियुको महाधिवेशनस्थलमा चर्को नाराबाजी हुँदा अब निर्वाचन गर्नुपर्ने भएको छ ।
२४ औँ महाधिवेशनको बन्दसत्रको कार्यक्रम अन्तर्गत मंगलबारबाट निर्वाचन प्रक्रिया सुरू हुँदै गर्दा एमाले नेतृत्वले सर्वसम्मतका लागि हस्तक्षेप गरेको थियो । सर्वसम्मतबाटै नेतृत्व तय गर्न निर्वाचन कमिटीलाई निर्देशन दिएपनि विद्यार्थीहरूले त्यसको अवज्ञा गर्ने चेतावनी दिँदै नाराबाजी गरेपछि एमाले प्रतिस्पर्धाको विकल्पमा जान बाध्य भएको हो ।
विद्यार्थीहरूले ‘वी वान्ट इलेक्सन’, ‘वी वान्ट इलेक्सन’ सहितका नारा लगाएका थिए । उनीहरूले सर्वसम्मतका नाममा निर्वाचनलाई निषेध गर्ने निर्णयलाई कुनै हालतमा अस्वीकार गर्ने चेतावनी दिएपछि निर्वाचन तालिका टाँसिएको छ ।
आइतबारबाट सुरू भएको महाधिवेशनको बन्दसत्रले संगठनको राजनीतिक, सांगठनिक र आर्थिक प्रतिवेदन समूहगत छलफल गरी पास गरेको थियो । महाधिवेशनको अध्यक्ष मण्डलका सदस्य एमाले संगठन विभाग सचिव माधव ढुङ्गेलले मंगलबार बिहान बन्दसत्रको बैठक सुरू गरेर निर्वाचन प्रक्रिया अघि बढाउने बताएका थिए ।
तर एमाले नेतृत्वले निर्वाचनमा जान नदिई सर्वसम्मतको कोशिष गरेपछि विद्रोह हुँदा युवा संघमा जस्तै निर्वाचन गर्नुपर्ने भएको हो । महाधिवेशनको हलले १५१ सदस्सीय केन्द्रीय कमिटी, ९ जना पदाधिकारी र ३२ वर्षे उमेर हदलाई यसअघि नै अनुमोदन गरेको थियो ।
