अविरल वर्षाको कारण गत जेठ २८ गतेदेखि देशका विभिन्न स्थानमा आएको बाढीपहिरो लगायतका मनसुनजन्य विपद्मा परी आज दिउँसोसम्म १५३ जनाको मृत्यु भएको छ । मनसुनजन्य विपद्मा परी सबैभन्दा धेरै गण्डकी प्रदेशमा ४३ जनाको मृत्यु भएको हो ।

केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीका अनुसार बाढीपहिरो लगायत विपद्मा परी काठमाडौँ उपत्यकामा तीन जना, कोशी प्रदेशमा २५ जना, मधेसमा छ जना, बागमतीमा २९ जना, गण्डकीमा ४३ जना, लुम्बिनीमा २९ जना, कर्णालीमा आठ जना र सुदूरपश्चिम प्रदेशमा १० जना गरी जम्मा १५३ जनाको मृत्यु भएको हो ।

बाढीपहिरोबाट काठमाडौँ उपत्यकामा १० जना, कोशी प्रदेशमा ३७ जना, मधेसमा १० जना, बागमतीमा १० जना, गण्डकीमा ३४ जना, लुम्बिनीमा ११ जना, कर्णालीमा ५१ जना र सुदूरपश्चिम प्रदेशमा १४ जना गरी १७७ जना घाइते भएका छन् । बाढीपहिरोबाट काठमाडौँ उपत्यकामा २६ जना, कोशी प्रदेशमा ४९ जना, बागमतीमा १२ जना, गण्डकीमा १४ जना, कर्णालीमा दुई जना र सुदूरपश्चिम प्रदेशमा पाँच जना गरी १०८ जनाको उद्धार गरिएको छ ।

प्रवक्ता कार्कीले भने, ‘आजसम्म बाढीपहिरोमा परी कोशी प्रदेशमा दुई जना, बागमतीमा ४२ जना, गण्डकीमा एक जना, कर्णालीमा एक जना र सुदूरपश्चिम प्रदेशमा एक जना गरी ४७ जना बेपत्ता भएका छन् । बेपत्ताको खोजी जारी छ ।’ उनका अनुसार बाढीका कारण जम्मा ३८४ घर डुबानमा परेका छन् ।

बाढीपहिरोकै कारण २६१ वटा घर, ९५ वटा गोठ, ४३ वटा पुल, दुई वटा विद्यालय र दुई वटा सरकारी कार्यालयमा क्षति पुगेको छ । बाढीपहिराले आजसम्म ७४३ वटा पशुचौपायाको मृत्यु भएको छ । उक्त अवधिमा विपद्का घटनाबाट चार हजार २३८ घर परिवार विस्थापित भएका प्रवक्ता कार्कीले जानकारी दिएका छन् ।