नारायणगढ–मुगलिङ सडक खण्डको सिमलतालमा पहिरोले हराई रहेको बस खोज्न आएका भारतीय टोली फर्किएको छ । बस र यात्रुको खोजीका लागि साउन ४ गते भारतका राष्ट्रिय आपदा मोचन बल एनडीआरएफ चितवन आएका थिए ।

सशस्त्र प्रहरी बलका विपद् व्यवस्थापन तालिम शिक्षालय कुरिन्टारका सुरक्षाकर्मी र भारतबाट आएका टोलीले संयुक्त रूपमा घटना स्थल सिमलतालदेखि केराबारी देवघाट शिवघाटसम्म खोजी गरेका थिए ।

भारतीय टोलीले ल्याएको सोनार र म्याग्नेट डीभाईसले खोजी गर्दा पनि बस फेला पार्न नसकेको प्रमुख जिल्ला अधिकारी इन्द्रदेव यादवले बताए । उनले खोजीको क्रममा दुई वटा पोइन्टमा भारतीय टोलीले शंका गरेको र अब सो स्थानहरूमा नेपालका सुरक्षाकर्मीहरूले खोजी कार्यलाई निरन्तरता दिने बताए ।

उनले हालसम्म २४ शव फेला परेकोमा १९ वटा शवको मात्र सनाखत भएको र पाँच वटा शवको सनाखत हुन नसकेको जानकारी दिए । अझै ४३ जना यात्रु हराइरहेको उनले बताए । काठमाडौँबाट गौर र वीरगन्जबाट काठमाडौँ तर्फ जाँदै गरेको बस सिमलतालमा पहिरोले बगाउँदा त्रिशूली नदीमा हराएका थिए ।