कोशी प्रदेशमा देखिएको संवैधानिक संकटलाई किनारा लगाउँदै सर्वोच्च अदालतको पूर्ण इजालसले परमादेश जारी गरेपछि मुख्यमन्त्रीमा नेकपा (एमाले) संसदीय दलका नेता हिक्मतकुमार कार्की नियुक्त भएका छन् ।

प्रदेश प्रमुख परशुराम खापुङले संविधानको धारा १६८ को उपधारा (३) अनुसार कार्कीलाई मुख्यमन्त्री नियुक्त गरेका हुन् । उनले शुक्रवार कार्कीलाई मुख्यमन्त्री नियुक्त गर्दै पद तथा गोपनीयताको सपथ ग्रहण गराए ।

नवनियुक्त मुख्यमन्त्री कार्कीले तीन मन्त्री र एक राज्यमन्त्री नियुक्त गरेका छन् । मन्त्रीहरूले पनि सपथ लिइसकेका छन् । ताप्लेजुङका तिलकुमार मेन्याङ्बोले ऊर्जा, सिँचाइ तथा जलस्रोत र स्वास्थ्य मन्त्रालयको जिम्मेवारी पाएका छन् ।

त्यसैगरी खोटाङका पाँचकर्ण राईले वन, वातावरण तथा पर्यटन र उद्योग, भूमि व्यवस्था तथा कृषि मन्त्रालय पाएका छन् । झापाका एकराज कार्की भौतिक पूर्वाधार विकासमन्त्री र भोजपुरकी सृजना राई सामाजिक विकास राज्यमन्त्री नियुक्त भएकी छन् ।