बाढीले घर डुबानमा परेपछि नेपालगन्ज उपमहानगरपालिका–२० गायत्रीटोलका पेम्बा तामाङ शुक्रबार रातिदेखि नजिकैको विद्यालयमा परिवारसहित आश्रित छन् । उनी बस्ने कोठामा मात्रै करिब २५ देखि ३० जना बाढीपीडित रहेका छन् ।

उनलाई बाढीका कारण घर भत्किने हो कि भन्ने चिन्तासँगै डेंगु सङ्क्रमणको अर्को चिन्ताले पिरोलेको छ । उनी भन्छन्, ‘चिसो भुइँमा ओछ्याउँछौं, अनि सुत्छौं, त्यसपछि लामखुट्टेले सुत्नै दिँदैन, रातभरि लामखुट्टे धपाउने मात्र काम हुन्छ ।’

अर्का बाढीपीडित शोभा बुढाको पीडा पनि उस्तै छ । यतिबेला उहाँ पनि एडिज एजिप्टाइ र एडिज अल्वोपिक्ट्स जातको पोथी लामखुट्टेको टोकाइबाट हुने डेंगु सङ्क्रमणको जोखिममा छन् । उनले भने, ‘घरमा झुल थियो, बाढीले बगाइदिँदा ल्याउनै पाइनँ, अहिले लामखुट्टेका कारण हैरानी खेपेको छु ।’

उनीहरू मात्र होइन बाढीपीडित कमानसिंह ठकुरी, धनबहादुर तामाङ, कौशिला थापा र रञ्जिता थापासँगै बाढीका कारण विस्थापित भएकाहरू सबै जना डेंगुको जोखिममा परेका छन् । नालासँगै जोडिएको शोभाको घर हेर्न लायक छैन । यतिबेला उनको घर डुबिसकेको छ ।

‘घरबाट केही सामान ल्याउन पाइएन, यहाँ व्यवस्था पनि राम्रो छैन, बिहानको खानलाई मात्र चामल र तरकारी छ,’ उनले भने, ‘साँझलाई चामल, तरकारी छैन, बाढीपीडित अहिले समस्यामा परेका छन् ।’ यहाँ झुलसहित लामखुट्टे धपाउने धुप भए सहज हुने बाढीपीडित कौशिलाले बताए ।

‘झुलको व्यवस्था हुनुपर्छ,’ उनले भने, ‘नत्र हामी सबै डेंगु सङ्क्रमणको सिकार हुन्छौँ ।’ लगातार भइरहेको वर्षाका कारण विद्युत् अनियमित हुँदा थप समस्या झेल्नुपरेको उनले बताए । बत्ती भएको भए त्यतिधेरै लामखुट्टे लाग्ने थिएनन्,’ उनले भने, ‘बत्ती पनि हुँदैन, आफ्नो झुल बाढीले बगाइसक्यो, अरू कसैले सहयोग गरेका छैनन् ।’

बाढीपीडितहरू डेंगु सङ्क्रमणको जोखिममा परेको भन्दै उहाँले तत्काल झुलको व्यवस्था हुनुपर्ने माग गरे । यतिबेला आश्रय लिएको विद्यालय प्राङ्गणमा खाल्डाखुल्डी भई पानी जम्दा लामखुट्टे बढी देखिएको बाढीपिडितको भनाइ छ । वडा तथा पालिका सरकारले तत्काल डेंगु सङ्क्रमणबाट बचाउन झुल वितरण गर्नुपर्ने बाढीपीडितको भनाइ छ । अहिले यहाँ करिब ३०–४० घरपरिवार विस्थतपित भइ आश्रित छन् ।

ज्येष्ठ नागरिक र गर्भवतीलाई समस्या

चिसोका कारण बाढीपीडित वृद्धवृद्धा र बालबालिका बिरामी हुन थालेका छन् । घरमा बाढी पसेपछि विद्यालयमा आश्रित वृद्धवृद्धा र बालबालिका बिरामी हुन थालेका हुन् । चिसो हुँदा वृद्धवृद्धा र बालबालिकालाई ज्वरोले सताउन थालेको छ । चिसोले ज्वरो आई बिरामी भएको कमानसिंह ठकुरीले बताए ।

उनले भने, ‘चिसो भुइँमा सुत्नुपर्छ, बूढो पनि भइयो, शरीरले चिसो पचाउन सक्दैन त्यसैले पनि होला, ज्वरो आएर थलिएको छु ।’ न्यानो बसाइँ नहुनु र खानपिनको समस्याका कारण आफू बिरामी भएको धनबहादुर तामाङले बताए । उनले भने, ‘बाहिर पानी रोकिएको छैन, स्वास्थ्योपचार गर्न कहाँ जानु ?’ साथै यहाँ रहेका सुत्केरी र गर्भवतीलाई समस्या हुँदै आएको छ ।

यतिबेला चिसोबाट बच्नुपर्ने र पौष्टिक र झोलिलो खानेकुरा खानुपर्ने समयमा उनीहरू त्यसबाट वञ्चित भएका छन् । यसैबीच विस्थापित बाढीपीडितलाई स्वास्थ्य लगायतका समस्या देखिएपछि नेपालगन्ज उपमहानगरपालिका अन्तरगत स्वास्थ्य शाखाले समस्याका बारेमा जानकारी लिने भएको छ । त्यहाँको समस्याबारे अध्ययन गरी स्वास्थ्योपचार गर्ने स्वास्थ्य शाखा प्रमुख रामबहादुर चन्दले बताए ।

उनले भने, ‘अश्रयस्थलमा बसेका बाढीपीडितलाई डेंगुको जोखिम बढेको छ भने अन्य स्वास्थ्य समस्या भएको जानकारी आएको छ, त्यसका लागि स्वास्थ्य टोलीमार्फत समस्या समाधान गर्नेछौँ ।’