जुम्लाको सिंजा गाउँपालिकाले वडा नम्बर–२ स्थित विष्टवाडामा आधारभूत स्वास्थ्य केन्द्रमा प्रसुति गृह स्थापना गरेको छ ।

गाउँपालिकाका अध्यक्ष पुर्णप्रसाद धितालले पालिकाको आवश्यकताका आधारमा थप सेवा विस्तार गर्न र यहाँका महिलाको स्वास्थ्य सेवामा सबैको सहज पहुँच गर्ने उद्देश्यले आधारभूत स्वास्थ्य केन्द्र स्थापना गरिएको बताए ।

छिट्टै ल्याव सेवा विस्तारका लागि स्वास्थ्य शाखा लागि परेको गाउँपालिकाको स्वास्थ्य शाखा संयोजक ललितजंग रोकायाले जानकारी दिए । ‘आवश्यक दक्ष जनशक्तिका लागि विज्ञापन गरेका छौं,’ संयोजक रोकायाले भने ।

यसअघि त्यो क्षेत्रका गर्भवती तथा सुत्केरी महिलाले प्रसुति सेवा लिनका लागि दुई घण्टा टाढा रहेको नराकोट स्वास्थ्य चौकीमा पुग्नुपर्थ्यो । यो बाध्यताबाट यहाँका महिला तथा अन्य नागरिकले अब छुटाकारा पाउने स्वास्थ्य शाखाले जनाएको छ ।

प्रसुति गृहका लागि आवश्यक दक्ष जनशक्ति एसबिए तालिम प्राप्त दक्ष जनशक्ति एक जना, अहेव दुई जना, अनमी दुई जना र सहयोगी एक जना गरी अहिले ६ जना जनशक्तिको व्यवस्थापन गरिएको गाउँपालिका अध्यक्ष धितालले जानकारी दिए ।

जनस्वास्थ्य कार्यालय जुम्लाको अनुगमन टोलीले त्यो क्षेत्रमा प्रसुति गृहको उपयुक्त ठानेपछि स्थापना गरिएको हो । गाउँपालिकाको धापा, नराकोट, शनिगाउँ, दात र विष्टवाडा गरी पाँच स्थानबाट अहिले पालिकाले प्रसुति सेवा प्रदान गर्दै आएको छ ।

घरमा सुत्केरी नहुने र स्वास्थ्य संस्थामै दक्ष जनशक्तिबाट सुरक्षित सुत्केरी गराउनका लागि यो गाउँपालिकाभित्र पाँच ठाउँबाट प्रसुति सेवा प्रदान गरिएको सिंजा गाउँपालिकाको स्वास्थ्यले जनाएको छ ।