मुगुको छायाँनाथ रारा नगरपपालिका–४ ताल्चामा रहेको रारा विमानस्थल विगत १९ वर्षदेखि टर्मिनल टावर काठको टहरामै रहेको छ ।

२०६० सालमा कच्ची धावन मार्गमार्फत् काठको टहराबाटै जहाज उडान र अवतरण सुरु गरिएको भए पनि अझै सुविधायुक्त टर्मिनल भवन निर्माण हुन सकेको छैन ।

३ वैशाख २०६० मा पहिलो पटक रारा विमानस्थल ताल्चामा परीक्षण उडान भयो, त्यसयता नियमित रुपमा हवाइ जहाज उड्न थाल्यो । विगत १९ वर्षदेखि निरन्तर उडान र अवतरण भइरहे पनि सामान्य हावा लाग्दासमेत काठको भवन हल्लिने गर्छ ।

जोखिम मोलेर कर्मचारीहरू टहरामै बसेर काम गर्न बाध्य भएका छन् । यात्रु विश्राम कक्ष पनि नहुँदा भुइँमे बस्नुपर्ने र सुरक्षा चुनौतीमा समस्या उत्पन्न भइरहेको स्थानीय रत्नसिंह मल्लले बताए । सुविधायुक्त टर्मिनल टावर निर्माण जारी छ ।

तर, ठेकेदारको ढिला सुस्तीका कारण काम सम्पन्न हुन अझै समय लाग्ने अवस्था छ । २०७२ सालमा ५७० मिटर लम्बाई र २० मिटर चौडाइको धावन मार्ग कालोपत्र गरे पनि मुख्य र संवेदनशील टावर टर्मिनल भवन नबन्दा समस्या छ ।

टर्मिनल टावर निर्माणका लागि नागरिक उड्डयन प्राधिकरणले २ वर्ष अघि ९ करोड रुपैयाँ विनियोजन गरी ओमबुद्ध इन्टरनेसनल कन्स्ट्रक्सन प्रालिसँग ठेक्का सम्झौता गरेको थियो । साढे दुई वर्ष बित्दासमेत मुस्किलले ५० प्रतिशत काम मात्र पूरा रारा नागरिक उड्डयन कार्यालय मुगुका प्रमुख सन्तोषकुमार गौतमले बताए ।

उनका अनुसार भौगोलिक विकटताका कारण समयमा सामान ढुवानी नहुनु र कोरोनाका कारण निर्माणमा अवरोध उत्पन्न हुँदा काम रोकियो । अहिले एक वर्ष म्याद पुनः थपिएको छ । तर, यो म्यादमा पनि निर्माण सकिने सम्भावना कम छ । विमानस्थलजस्तो संवेदनशील क्षेत्रमा पनि सुरक्षाको कुनै प्रबन्ध छैन ।

विमानस्थल वरपर दुईवटा घेराबार हुनुपर्ने भए पनि एउटा सामान्य तारलेसम्म बारिएको छैन । विमानस्थलको चारैतिर मानिस, पशु, गाई, गोरु, कुकुर, स्याल हिँड्ने बाटो मात्र रहेको छ । तत्काल घेरबार गर्न सम्बन्धित निकायको ध्यान नपुगे कुनै दिन दुर्घटना निम्तिन सक्ने भन्न्दै चिन्ता जनाइएको छ ।

न्युज कारखाना