नेपाली सेनाको क्याप्टेन हुँ भन्दै हिँड्ने एक ब्यक्ति जाजरकोटमा पक्राउ परेका छन् । जाजरकोट नलगाड नगरपालिका १३ खातीगुर्ताका २७ बर्षीय विष्णु गिरीलाई नक्कली कागजातसहित प्रहरीले पक्राउ गरेको हो ।

सरकारी छाप, दस्तखतको दुरुपयोग गरी नक्कली परिचय पत्र बनाई साथमा हिँड्ने गरेको भन्ने गोप्य सूचनाका आधारमा इलाका प्रहरी कार्यालय दल्लीबाट खटिएको प्रहरी टोलीले गिरीलाई पक्राउ गरेको हो ।

उनको साथबाट नेपाली सेनाको सह–सेनानी दर्जासहितको फोटो भएका परिचय पत्र फेला पारिएको प्रहरी निरीक्षक पुस्कर पन्तले जानकारी दिए । उनीमाथि जिल्ला अदालतले पाँच दिनको म्याद थप गरि अनुसन्धान भैरहेको प्रहरीले जनाएको छ ।