‘इन्धनमा ५० लाख खर्च भएको छैन’
पूर्व जनप्रतिनिधि भन्छन्, ‘गाउँपालिकामा भ्रष्टाचार भएको छैन ।’ कार्यकारी अधिकृत भन्छिन्, ‘मेरो चरित्र हत्या भयो ।’
पर्साको बिन्दबासिनी गाउँपालिकामा भ्रष्टाचार नभएको पूर्व जनप्रतिनिधिहरुले ठोकुवा गरेका छन् । गाउँपालिकाका तत्कालिन प्रमूख प्रशासकीय अधिकृत मुन्ना रौनियारको पालामा भ्रष्टाचार भएको समाचार आएपछि आफूहरुको ध्यान गएको भन्दै पूर्व जनप्रतिनिधिहरुले भ्रष्टाचार नभएको बताएका छन् ।
आफ्नो पालामा कहीँकतै पनि भ्रष्टाचार नभएको उनको दावी छ । अधिकृत रौनियारले पूर्व जनप्रतिनधिको नेतृत्वमा गाउँपालिकामा उल्लेखनीय र सह्रानीय काम भएको समेत बताए । सत्य र तथ्यबिनाको मनगढन्ते समाचारले आफ्नो चरित्र हत्या गर्न खोजिएको प्रमुख प्रशासकीय अधिकृत रौनियारले दुखेसो पोखेका छन् ।
यता गाउँपालिकाको तथ्याङ्कअनुसार इन्धनमा ३१ लाख रकम विनियोजन भएकोमा ३० लाख २४ हजार १०४ रुपैयाँ खर्च देखिएको छ । नेपाल सरकारको मापदण्ड अनुसार नै इन्धन रकम खर्च भएको गाउँपालिकाको तथ्याङ्क छ । केही दिनअघि इन्धनमा भ्रष्टाचार भएको, ५० लाख खर्च देखाएपछि आफ्नो ध्यान गएको अधिकृत रौनियार बताउँछन् ।
प्रमुख प्रशासकीय अधिकृत रौनियारले आफुले नगरेको कामलाई नै लिएर हचुवाको भरमा समाचार लेखेर केही सञ्चारमाध्यमले आफ्नो चरित्र हत्या गरेको प्रतिक्रिया दिएका छन् । ‘मैले गाउँपालिकामा हुँदा एक रुपैयाँ भ्रष्टचार गरेको छैन ।’ उनले सबैभन्दा धेरै इन्धन गाउँपालिकाको जेसिबी र एम्बुलेन्समा खर्च भएको दावी गरे ।
गाउँपालिकाले सार्वजनिक तथा विकासका काम गर्ने क्रममा जेसिबी चलाउँदा त्यसबापत भाडा नआउने भएकाले इन्धन खर्च बढी देखिएको बताए । साथै गाउँपालिका अन्तर्गतका बिरामीका लागि एम्बुलेन्सले न्यूनतम खर्चमा बिरामी ओसारपोसार गर्ने भएकोले एम्बुलेन्समा पनि इन्धन खर्च बढी देखिएको रौनियारको दावी छ ।
‘जेसिबी र एम्बुलेन्सको भाडाबाट ती साधनको मर्मत खर्च पनि नपुग्ने भएकोले इन्धन कहाँबाट पुर्याउने ?’ उनले प्रश्न गर्दै भने । उनले गाउँपालिका अन्तरगतका ७० जना कर्मचारी लगायत गाउँपालिकाका प्रमुख, उपप्रमुख लगायत वडाध्यक्षहरुलाई पनि तोकिए बमोजिम इन्धन दिनुपर्ने भएकाले पनि खर्च बढी देखिएको बताए ।
पत्रकारिता जस्तो मर्यादिन पेशालाई तथ्य र प्रमाणबिना अमर्यादित समाचार नलेख्न आग्रह गर्दै गल्ती गरेको भए तथ्य र प्रमाणसहित लेख्न पनि उनले अनुरोध गरेका छन् । गाउँपालिका अन्तर्गत पर्ने गर्दौलमा नयाँ सडक निर्माणमा गाउँपालिकाकै जेसिबी प्रयोग भएकोले पनि बढी इन्धन खर्च भएको पूर्व वडाध्यक्षहरु बताउँछन् ।
गाउँपालिकाकी पूर्व उपाध्यक्ष किरण देवीले पनि अधिकृत रौनियारले लाखौं भ्रष्टाचार गरेको समाचार विश्वसनीय नभएको जिकिर गरिन् । उनले आफुहरुको कार्यकालमा कहीँकतै भ्रष्टाचार नभएको र अधिकृत रौनियारलाई भ्रष्टाचार गर्न नदिएको बताइन् । ‘मैले उहाँको स्वभाव बुझेकी छु, चिनेकी छु, उहाँले भ्रष्टाचार गरेको कुरा निराधार हो ।’
कृष्णा कुशवाहा । वीरगन्ज ।