हिरासतमा मात्रै नभई जिल्लामा बसोबास गर्ने नागरिकको जिउधनको सुरक्षाको जिम्मेवारी लिएको प्रहरीले नै राक्षसी प्रवृत्ति देखाएपछि यतिबेला नेपाल प्रहरीको नैतिकतामाथि प्रश्न खडा भएको देखिएको छ ।

इलाका प्रहरी कार्यालय कोहलपुर प्रहरीमा कार्यरत एक असईले थुनुवा महिलामाथि नै बलात्कार प्रयासको आरोप खेपेका छन् । बाँकेमा एसपी अधिकारीको कमजोर प्रशासनका कारण प्रहरीकै हिरासतमा थुनुवाका रूपमा रहेका महिलासम्म सुरक्षित हुन सकिरहेका छैनन् ।

कोहलपुर प्रहरीको हिरासतमा रहेकी एक थुनुवा महिलालाई प्रहरीका असईले नै बलात्कार गरेको आरोप लागेको छ । बहुविवाह मुद्दामा हिरासतमा रहेकी महिलालाई ती असईले शुक्रबार बिहान करिब २ बजेको समयमा बलात्कारको प्रयास गरेको खुलेको छ ।

हिरासतमा रहेकी ती महिलालाई कोहलपुर प्रहरीको मुद्दा फाँटमा कार्यरत असई प्रविण चौलागाईले बलात्कारको प्रयास गरेको आरोप लागेको छ । चौलागाई रातको समयमा मदिरा पिएर मस्त भएको पनि प्रहरी अधिकारीहरु नै बताउँछन् ।

मदिरा खाएको भनिएका असई चौलागाईले थुनुवा कक्षमा रहेकी ती महिलालाई सोधपुक्षमा लागी भन्दै बोलाएर अर्को कोठामा लगेको र बलात्कारको प्रयास गरेको आरोप छ । आरोपित असई चौलागाईले भने आफुले थुनुवा महिलामाथि बलात्कारको प्रयास नगरेको बताएका छन् ।

आफु र श्रीमती थुनुवामा रहेको समयमा राती २ बजेको समयमा प्रहरीले सोधपुक्षको लागि भन्दै श्रीमतीलाई बोलाएर लगेको पीडित थुनुवा महिलाका श्रीमान बताउँछन् । उनकाअनुसार केही समयपछि श्रीमति आएर रून थालेपछि आफुले र अन्य साथीले के भयो भनेर सोधपुछ गर्दा उनले घटनाका बारे बताएकी हुन् ।

घटना सार्वजनिक भैसकेपछि जिल्ला प्रहरी कार्यालय बाँकेका एसपी श्यामकृष्ण अधिकारी, डिएसपी मधुसुदन न्यौपाने बलात्कार प्रयासको घटना ढाकछोपमा सक्रिय रहेको नागरिक बताउँछन् । घटना सार्वजनिक भएपछि एसपी अधिकारीको निर्देशनमा नेपालगन्जका डिएसपी मधुसुदन न्यौपाने कोहलपुर पुगेका थिए ।

डिएसपी न्यौपाने कसरी हुन्छ उक्त घटना ढाकछोप गर्ने र बलात्कार प्रयासमा सक्रिय भनिएका असईलाई कानूनी दायराबाट उन्मुक्ति दिने भन्ने योजनामा लागेको प्रहरी बृत्तमै चर्चा चर्चा चलिरहेको छ । यद्यपी इलाका प्रहरी कार्यालय कोहलपुरका डिएसपी ऐनबहादुर मल्ल केही दिनदेखि विदामा रहेको खुलेको छ ।

बाँकेको सुरक्षा मजबुद रहेको दाबी गर्ने बाँकेका एसपी श्यामकृष्ण अधिकारीलाई यतिबेला आमनागरिकले प्रश्न गर्दै भन्छन्, ‘आफ्नै हिरासतमा रहेका थुनुवा त प्रहरीबाट सुरक्षित छैनन्, एसपी साब तपाईले बाँकेबासीको सुरक्षा कसरी गर्नुहुन्छ ?’ बाँके प्रहरी र यहाँका प्रहरी कमाण्डरहरु शुरूदेखि नै बदनामी कमाउँदै आएका छन् ।

तर, राज्यको गृह मन्त्रालय र केही राजनीति दलहरुले यस्ता बदनामी प्रहरी अधिकारी र कर्मचारीको संरक्षण गर्दा यतिबेला थुनुवा महिलाले समेत प्रहरी हिरासतमै बलात्कारको शिकार हुनुपरेको देखिएको छ । नागरिकलाई मापसे सेवन गर्ने प्रहरी नै मदिरा खाएर थुनुवामाथि बलात्कारको प्रयास गर्दा अझै घटना ढाकछोप गर्न खोज्ने बाँके प्रहरीका अधिकारीमाथि नै कारवाही गरिनुपर्ने नागरिकको आवाज छ ।

घटना सार्वजनिक भैसक्दा पनि बाँके प्रहरीले ‘हामीले त्यस्तो गर्ने भन्ने कुरा नै हुन्न । उनीलाई सोधपुछ मात्र भएको हो,’ भनेर भुटको खेती गर्नु र दोषीलाई बचाउन खोज्नु कतिसम्मको घृणित कार्य हो आम नागरिकले मुल्याङ्कन गर्ने बेला आएको देखिएको छ । ठाउँका ठाउँ असई चौलागाई र कमाण्ड गतिलो सम्हाल्न नसकेको जिल्ला प्रहरीको नेतृत्वमाथि कारवाही हुनुपर्ने कोहलपुरबासीको अडान छ ।

घटना सार्वजनिक भैसकेपछि छानबिनका लागि भनेर समिति गठन गर्नुको कुनै तुक नभएको नागरिकहरु बताउँछन् । बाँकेका प्रहरी प्रवक्ता नेपालगन्जका डीएसपी मधुसुदन न्यौपाने एसपी अधिकारीको निर्देशनमा कोहलपुर गएर घटना मिलाउनका लागि पत्रकारदेखि स्थानीय राजनीतिक दल र नागरिकहरूसँग हारगुहार तथा विन्ति गरिरहेको कोहलपुरका पत्रकार श्रीधर सुवेदी बताउँछन् । (ईसेतोखरीबाट)