जिल्लाको पुर्चौंडी बहुमुखी क्याम्पसका प्रमुख राजेन्द्रसिंह नेगीमाथि बलात्कारको आरोप लागेको छ ।

आरोप लागेका नेगीविरुद्ध जबरजस्तीकरणी मुद्दा दर्ता भएको बैतडीका प्रहरी प्रवक्ता, प्रहरी निरीक्षक लोकराज जोशीले जानकारी दिनुभयो ।

आफूमाथि जबरजस्ती करणी गरेको भन्दै कैलालीकी एक महिलाले दिएको जाहेरीका आधारमा नेगी विरुद्ध इलाका प्रहरी कार्यालय, पाटनमा जबरजस्तीकरणी मुद्दा दर्ता भएको हो ।

पीडित महिलाले दिएको जाहेरीका आधारमा मुद्दा दर्ता भएपछि क्याम्पस प्रमुख नेगीलाई पक्राउ गरेर अनुसन्धान गर्ने तयारी भएको प्रहरीले जनाएको छ ।

कैलाली घर भई बैतडीको पुर्चौंडीमा ज्यालामजदुरी गर्दै आएकी एक महिलामाथि क्याम्पस प्रमुख नेगीले बलात्कार गरेको आरोप लगाएकी हुन् ।

असार २० गते पानी माग्ने निहुँमा महिलामाथि नेगीले बलात्कार गरेको पीडितलाई उद्धृत गर्दै प्रहरीले जनाएको छ । पीडित महिलाको बुधबार स्वास्थ्य परीक्षण गरिएको छ । रिपोर्ट आउन बाँकी छ ।

आरोप लागेपछि क्याम्पस प्रमुख नेगीले पदबाट राजीनामा दिनुभएको छ ।