सुदूरपश्चिम प्रदेशमा पछिल्ला दिनमा कोरोना भाइरसबाट संक्रमित हुनेको संख्या बढ्न थालेको छ ।

गएको २४ घन्टामा पिसिआर र एन्टिजेन पद्दतिबाट नमूना परीक्षण गरिएकामध्ये पाँच जनामा कोरोना भाइरसको संक्रमण देखिएको छ । स्वास्थ्य निर्देशनालय दीपायलको तथ्याङ्क अनुसार सीमा नाकामा २ सय ९३ जनाको नमूना परीक्षण गरिएको थियो ।

पछिल्लो एक हप्तामा ११ जनामा कोरोनाको संक्रमण देखिएको छ । गएको फागुनयता यो रोगका कारण हुने मृत्यू दर भने शून्य छ । भारतमा यो रोगको संक्रमण बढेसँगै नेपालमा पनि संक्रमण बढ्ने जोखिम देखिएकोे सीमा नाकामा खटिएका स्वास्थ्यकर्मीहरू बताउँछन् ।

भातरबाट फर्किनेमा कोरोना संक्रमण देखिन थालेको बताइएको छ । भारतबाट भित्रिनेहरु आफ्नो नमूनाको नतिजा नआउँदै गन्तव्यमा हिँड्दा समस्या भइरहेको स्वास्थ्यकर्मीहरुको भनाइ छ । सुदूरपश्चिम प्रदेशमा हालसम्म खोप दिनुपर्ने लक्षित जनसंख्या मध्ये अधिकांशले पूर्ण मात्राको खोप पाइसकेको निर्देशनालयले जनाएको छ ।

बालबालिकालाई खोप दिने तयारी भइरहेको छ । कोरोना भाइरसको सम्भावित जोखिम हुन नदिन सुरुका वर्षको तुलनामा हाल अस्पताल र स्वास्थ्य संस्थामा आवश्यक पूर्वाधार जुटेको भए पनि दक्ष जनशक्तिको भने अझै अभाव रहेको जनाइएको छ ।