दाङको तुलसीपुर उपमहानगरपालिकामा मतगणना रोकिएको छ ।

मतगणना स्थलमा एजेन्ट प्रवेशको विषयलाई लिएर विवाद हुँदा केहि समयका लागि मतगणना कार्य रोकिएको दाङका प्रमुख जिल्ला अधिकारी हिरालाल रेग्मीले जानकारी दिनुभयो । मतगणना उच्च सरकारी वकिलको कार्यालयको हलमा भइरहेको छ ।

एमालेका प्रतिनिधिले सहमती अनुसार एकजना उम्मेदवार बराबार एक जना मात्र एजेन्ट हुनुपर्ने माग राखेको छ ।

नेपाली कांग्रेसले गठबन्धनबाट पाँच जना र एमालेबाट एक जना मात्र हुनुपर्ने भन्दै एजेन्ट भित्र प्रवेश गराएपछि विवाद भएको हो ।

विवाद अघि एक जना उम्मेदवार बराबर एक जना प्रतिनिधिको सहभागीता रहेको थियो । एजेन्टका विषयमा विवाद भएपछि नाराबाजी समेत भएको छ ।

विवादका कारण मतगणना भइसकेका वडाको अन्तिम नतिजा समेत सार्वजनिक गरिएको छैन ।