राष्ट्रिय सूचना आयोगले १५ औँ स्थापना दिवस मनाउँदै छ । संविधानमा सूचनाको हक मौलिक हकका रुपमा स्थापित छ ।

नेपालको संविधानको धारा २७ मा, ‘प्रत्येक नागरिकलाई आफ्नो वा सार्वजनिक सरोकारको कुनै पनि विषयको सूचना माग्ने र पाउने हक हुनेछ’ भनेर सूचनाको हकलाई संवैधानिक रूपमै व्यवस्था गरिएको छ ।

संवैधानिक रूपमा नागरिकलाई दिइएको सूचनाको अधिकारको व्यावहारिक प्रयोगका लागि सूचनाको हकसम्बन्धी ऐन तथा स्वतन्त्र आयोगको रूपमा राष्ट्रिय सूचना आयोगको गठन भएको आज १४ वर्ष पूरा भएको हो ।

तर सूचनाको हकको कार्यान्वयन जति हुनुपर्ने थियो त्यति प्रभावकारी हुन नसकेको गुनासो छ । सूचना नपाएपछि राष्ट्रिय सूचना आयोगमा परेको पुनरावेदनको सङ्ख्या ८ हजारको हाराहारीमा छ ।

राष्ट्रिय सूचना आयोगका प्रमुख सूचना आयुक्त महेन्द्रमान गुरुङले पालिका चुनावमा सही, तथ्यगत र आधिकारिक सूचनाको महत्त्व अझ बढेको भन्दै नकारात्मक असर पार्न सक्ने सूचना सम्प्रेषण नगर्न आग्रह गर्नुभएको छ । साथै उहाँले मागिएका सूचना सहज रुपमा उपलब्ध गराउन पनि सार्वजनिक निकायलाई आग्रह गर्नुभएको छ ।

यस्तै, स्थापना दिवसका अवसरमा शुभकामना दिँदै प्रधानमन्त्री शेरबहादुर देउवाले सूचनाको हक सुशासन र लोकतान्त्रिक शासन पद्धतिको आधार रहेको बताउनुभएको छ ।

उहाँले सूचनाको हकलाई प्रवर्द्धन र संवर्द्धन गर्नुपर्नेमा जोड दिनुभएको छ ।