भक्तपुरको बिस्काः जात्राको क्रममा बुधबार राति अबेरसम्म प्रयास गर्दा पनि भेलुखेलस्थित योसिंखेलमा ५५ हात लामो ल्योसिंद्यो (लिङ्गो) उभ्याउने प्रयास सफल हुन सकेन । साँंझदेखि राति ११ बजेसम्म निरन्तर उठाउने प्रयास गरे पनि लिङ्गो उठाउन असफल भएको हो ।

बुधबार उठाउन असफल भएको लिङ्गोलाई आज बिहीबार उठाएर आजै साँंझ ढाल्ने परम्परा छ । सयौं युवाहरुले डोरीको सहायताले लिङ्गो उठाउने प्रयास गरेका थिए । घण्टौंको प्रयासपछि पनि लिङ्गो उठाउन सफल भएन ।

लिङ्गो ५५ हात लामो र ठूलो भएका कारण कुनै वर्ष यसरी निर्धारित दिनमा उठाउन नसकेको इतिहास छ । तर लिङ्गो उठाउने नसकेको इतिहास भने छैन । निर्धारित दिनमा उठाउन नसकेको लिङ्गोलाई बैशाख १ गते जसरी पनि उठाएर ढाल्ने गरिन्छ ।

यसलाई उठाउन आज पनि दिनभर प्रयास हुनेछ । आठ वटा डोरीको सहायताले तानेर उठाउने प्रयास हुन्छ । तर कुनै वर्ष यसरी उठाउन नसकिने हुन्छ ।

चैत मसान्तमा उभ्याउनुपर्ने तर नभ्याउन नसकेको लिङ्गोलाई वैशाख १ गते जसरी पनि उठाइन्छ । उठाइएको लिंगोलाई अनि यही दिन परम्परा अनुसार ढालिन्छ ।

आठ रात नौ दिन लामो बिस्का जात्राको यो सबैभन्दा बढी मुख्य आकर्षणको जात्रा यही नै हो । यो जात्रा हेर्नका लागि भक्तपुरसहित काठमाडौं, ललितपुर, काभ्रेपलान्चोकलगायतबाट सयौं मानिसहरु आउने गर्दछन् ।